फोंडा: फोंड्यातील रस्त्यांच्या दुरुस्तीकामाला प्रारंभ झाला, काही रस्ते दुरूस्त झाले, पण पाऊस कोसळत असल्याने अनेक ठिकाणी रस्ते पुन्हा खराब झाले. काही ठिकाणी केलेला रस्ता उखडला असून वाहूनही गेला.

फोंड्यातील मुख्य रस्त्यांचे हॉटमिक्स डांबरीकरण करण्यात आले होते, मात्र मुसळधार पावसामुळे बऱ्याच ठिकाणचे रस्ते वाहून गेले होेते. अधूनमधून जोरदार पाऊस कोसळत असल्याने काही ठिकाणचे रस्ते पुन्हा एकदा खराब झाले आहेत. चतुर्थीनंतर पुन्हा या रस्त्यांचे काम करावे लागणार आहे.

रस्त्यांची परत परत खोदाई!

फोंड्यातील मलनिस्सारण प्रकल्पाच्या कामामुळे रस्ते अधिक खराब झाले आहेत. एका बाजूला रस्त्यांचे हॉटमिक्स डांबरीकरण करायचे तर दुसऱ्या बाजूला मलनिस्सारण प्रकल्पाच्या कामासोबतच भूमिगत वीज केबलचे काम आणि गॅस वाहिनीच्या कामामुळे रस्ते पुन्हा खोदण्यात आले, त्यामुळे केलेले रस्ते खराब झाले आहेत. ही कामे वेळेत झाली असती तर रस्ते खराब दिसले नसते, असे फोंडावासीयांचे म्हणणे आहे.