फोंडा: फोंड्यातील एका हॉटेलमध्ये सुरू असलेल्या सेक्स रॅकेटचा फोंडा पोलिसांनी पर्दाफाश केल्यानंतर या रॅकेटमधील फरार मास्टरमाईंड सलीम इब्राहीम कुरेशी (४३) या मूळ बेळगाव येथील संशयिताला पोलिसांनी रात्री अटक केली.

फोंड्यातील एका हॉटेलमध्ये सेक्स रॅकेट सुरू असल्याची माहिती फोंडा पोलिसांना मिळाल्यानंतर पोलिस निरीक्षक विजयनाथ कवळेकर यांच्या मार्गदर्शनाखाली गेल्या ३० ऑगस्ट रोजी एक तपास पथक तयार करण्यात आले होते.

या पथकात ‘अर्ज’ या स्वयंसेवी संस्थेला सामील करून घेऊन बनावट ग्राहक या हॉटेलात पाठवण्यात आला आणि तिघा संशयितांना पकडण्यात आले तर पीडित युवतीला महिला सुधारगृहात पाठवण्यात आले.

पोलिसांनी मूळ पश्चिम बंगालमधील; पण सध्या गोव्यात वास्तव्यास असलेल्या नझीम (३३) व जमेदार (३८) या दोघांसह राजेश गौड (४९) या मूळ उत्तर प्रदेशमधील; पण सध्या बिठ्ठोण येथे राहणाऱ्याला फोंडा पोलिसांनी अटक केली होती. सध्या हे तिघेजण न्यायालयीन कोठडीत आहेत. दरम्यान, या प्रकरणातील चौथा मास्टरमाईंड सलीम कुरेशी हा लपून राहिला होता. फोंडा पोलिसांनी त्याला बेळगाव भागातून शोधून काढून अखेर अटक करण्यात आली आहे.

चौघांचा सहभाग

पश्चिम बंगालमधील नझीम व जमेदार हे एखाद्या पीडित युवतीला शोधून तिला वेश्याव्यवसायात ढकलायचे. अशा युवतीला गोव्यात आणल्यानंतर राजेश गौडा हा ग्राहक आणायचा. सलीम कुरेशी या सर्वांवर ‘लक्ष’ ठेवायचा आणि ग्राहकांकडून पैसे उकळल्यानंतर ते आपसांत वाटून घ्यायचे. मात्र, या रॅकेटवर कारवाई करण्यात आली आहे. पोलिस उपअधीक्षक शिवराम वायंगणकर यांच्या मार्गदर्शनाखाली पुढील तपास सुरू आहे.