पिळगाव येथून धक्कादायक बातमी समोर आली आहे. पिळगाव येथे मांडवी नदीत अज्ञात व्यक्तीचा मृतदेह तरंगताना आढळून आल्याने एकच खळबळ उडाली. डिचोली अग्निशमन दलाच्या जवानांनी तात्काळ घटनास्थळी पोहोचून मृतदेह पाण्याबाहेर काढला.

पोलिसांकडून ओळख पटवण्याचे काम सुरु आहे. या अज्ञात व्यक्तीचा खून करण्यात आला की त्याने आत्महत्या केली हे अद्याप स्पष्ट झालेले नाही. पोलिसांनी पंचनामा करुन मृतदेह गोवा वैद्यकीय महाविद्यालय रुग्णालयात पाठवला आहे. दरम्यान, राज्यात गेल्या काही दिवसांपासून अशा प्रकारच्या घटना सातत्याने समोर येतायेत.

काही दिवसांपूर्वी, मुर्डीवाडा-नार्वे येथून अशीच घटना समोर आली होती. मुर्डीवाडा-नार्वे येथील मांडवी नदीत (Mandvi River) अज्ञात तरुणाचा कुजलेल्या अवस्थेतील मृतदेह आढळून आला होता. डिचोली पोलिसांनी तात्काळ घटनेची माहिती अग्निशामक दलाला देताच दलाचे अधिकारी श्रीपाद गावस यांच्या मार्गदर्शनाखाली दलाच्या जवानांनी घटनास्थळी धाव घेतली होती.

लिडींग फायर फायटर प्रल्हाद देसाई यांच्या नेतृत्वाखाली शैलेश साळकर (Driver-operator), रावजीराव राणे, जितेश नाईक आणि संदीप गावस या दलाच्या जवानांनी तेथीलच होडीचा वापर करुन मृतदेह नदीतून बाहेर काढला होता. त्यानंतर पोलिसांनी पंचनामा करुन मृतदेह उत्तरीय तपासणीसाठी बांबोळी येथे पाठवला होता.