वाहतुकीला शिस्त लागावी, राज्यातील अपघातांच्या प्रमाणात घट व्हावी यासाठी राज्य सरकारने अल्पवयीन मुले वाहन चालविताना आढळल्यास थेट वाहनमालकाला अटक करण्याचा कठोर निर्णय घेतला असल्याचे काल मुख्यमंत्री प्रमोद सावंत यांनी पत्रकार परिषदेत सांगितले होते. याच पार्श्वभूमीवर आता म्हापसा पोलिसांनी अल्पवयीन वाहन चालकांवर करावाई करण्यास सुरुवात केली आहे. म्हापसा उपविभागाच्या पोलिसांनी या कारवाईत 11 स्कुटर व मोटारसाईकल जप्त केल्या आहेत.

म्हापसा उपविभागाच्या पोलिसांनी अचानकपणे अल्पवयीन दुचाकीचालकांविरोधात कारवाईची मोहिम राबवली. या मोहिमेत शाळेच्या परिसरात अल्पवयीन मुले दुचाकीचालवत असल्याचे आढळून आले. यावेळी पोलिसांनी अल्पवयीन वाहन चालकांवर कारवाईत करत 11 स्कुटर व मोटारसाईकल जप्त केल्या आहेत. याबाबत उपविभागीय पोलीस अधिकारी जिवबा दळवी यांनी दिलेल्या माहितीनुसार, अल्पवयीन मुलांचे पालक आणि दुचाकी मालकांना पोलीस ठाण्यात बोलावून त्यांचे समुपदेशन करण्यात आले. ही पहिलीच वेळ असल्याने त्यांना ताकीद देण्यात आली आहे. याबाबतचा अहवाल शिक्षण विभाग व अन्य अधिकाऱ्यांना सादर करण्यात येणार आहे. या कारवाईत म्हापसा पोलिसांनी 3 दुचाकी, कोलवाळ पोलिसांनी 7 दुचाकी व हणजुण येथील 1 दुचाकी जप्त केल्या आहेत.

वाहनांच्या मालकांना व पालकांना अल्पवयीन व्यक्तीला मोटार वाहन चालविण्यास परवानगी देणे तसेच अन्य कलमांचे उल्लंघन केल्याबद्दल चलान जारी करण्यात आले आहे. ही कारवाई उत्तर गोवा पोलिस अधीक्षक निधीन वाल्सन, उपविभागीय पोलीस अधिकारी जिवबा दळवी यांच्या मार्गदर्शनाखाली कोलवाळचे पोलीस निरीक्षक सोमनाथ महाजिक, म्हापसा पोलीस निरीक्षक परेश नाईक आणि हणजुणचे पोलीस निरीक्षक प्रशाल देसाई यांनी केली.