Goa Crime : पर्यटकांनो गोव्यात येताय तर सावधान! एस्कॉर्ट सेवेच्या नावाखाली लुटीच्या प्रकरणांमध्ये वाढ

एस्कॉर्ट सेवा देण्याच्या नावाखाली आंध्रप्रदेशातील पर्यटकाला 40 हजार रुपयांचा गंडा घातल्याचा प्रकार काही दिवसांंपूर्वी उघडकीस आला होता. याप्रकरणी पणजी पोलिसांनी एका महिलेला अटक केली होती. अटक करण्यात आलेल्या संशयित महिलेचे नाव रोशनी कवास (27, बेती, बार्देश) असे आहे. दरम्यान, संशयित रोशनी कवास हिला एस्कॉर्ट सेवा प्रकरणी आणखीन एका गुन्ह्यात आज पुन्हा अटक करण्यात आली आहे. म्हापसा पोलिसांनी ही अटक केली आहे.

पहिल्या प्रकरणामध्ये एस्कॉर्ट सेवा देण्याच्या नावाखाली आंध्रप्रदेशातील नाजुरुल्ला शेख या पर्यटकाला गंडा घातल्याचा प्रकार उघडकीस आला होता. बुधवारी मध्यरात्री १२.३० ते १.३० वाजता तक्रारदार नाजुरुल्ला शेख याला पणजीतील एका खोलीत बंद करून त्याच्याकडून १५ हजार रुपये हिसकावून घेतले. तसेच त्याला मारहाण करून त्याच्याकडून २५ हजार रुपयांचा मोबाईल काढून घेतला आणि त्याला धमकी देऊन आणखीन २० हजार रुपयांची खंडणी मागितल्याचे तक्रारीत नमूद करण्यात आले. याची दखल घेऊन पणजी पोलीस निरीक्षक निखिल पालयेकर यांच्या मार्गदर्शनाखाली पोलीस उपनिरीक्षक मयुर पणशीकर यांनी अज्ञात महिलेविरोधात भारतीय दंड संहितेच्या कलम ३२३, ५०४, ५०६(), ३९२, ३४२ आणि आरडब्ल्यू ३४ अंतर्गत गुन्हा दाखल करून चौकशी सुरू केली. संबंधित महिला बेती येथील असल्याची माहिती मिळताच बेती येथुन महिलेला ताब्यात घेण्यात आले.

दरम्यान, आता दुसऱ्या एस्कॉर्टच्या प्रकरणामध्ये संशयित रोशनी कवास या महिलेने हैदराबाद तेलंगणा येथील पर्यटकांना धमकी देऊन 20 हजार रुपये रोख व मोबाईल फोन हिसकावून घेतल्या प्रकरणी म्हापसा पोलिसांनी अटक केली आहे.