Goa Petrol Diesel Price

गोवा राज्य सरकारने इंधनावर लावण्यात येणाऱ्या मूल्यवर्धित करात वाढ केली असून, उद्यापासून (22 जून) पेट्रोल एक रुपयांनी तर डिझेल 36 पैशांनी महाग होणार आहे. नवी दारवाढ लागू होण्यासाठी काही तास शिल्लक असताना राज्यातील पंपांवर वाहन धारकांची गर्दी पाहायला मिळत आहे.

गोवा सरकारच्या वतीने शुक्रवारी काढलेल्या आदेशाद्वारे पेट्रोल आणि डिझेलवर लावण्यात येणाऱ्या मूल्यवर्धित करात (Value Added Tax) वाढ केली. नव्या करवाढीनुसार, पेट्रोलच्या दरात एक रुपयांनी तर डिझेलच्या दरात 0.36 पैशांनी वाढ होणार आहे.

उद्या म्हणजेच शनिवारी (दि. 22 जून) पासून नवी दरवाढ लागू होणार असल्याने वाहन धारकांनी नवी दरवाढ लागू होण्यापूर्वी पंपांवर गर्दी केली.

उत्तर गोव्यात (पणजी) पेट्रोल 95.34 रुपये प्रतिलिटर आणि दक्षिण गोव्यात 95.41 रुपये प्रतिलिटर दराने विक्री होत आहे. तर डिझेल राजधानी पणजीसह उत्तर गोव्यात 87.90 आणि दक्षिण गोव्यात 87.97 रुपये दराने विक्री होत आहे.

व्हॅट वाढीवरुन विरोधकांची सरकारवर टीका

राज्य सरकारने व्हॅटमध्ये वाढ केल्याने विरोधकांनी सरकारवर टीका केली आहे. लोकसभा निवडणूक संपल्याने ये तो होना ही था, अशा शब्दात विरोधीपक्षनेते युरी आलेमाव यांनी भाजप सरकारवर टीका केली. तसेच, ही दरवाढ राज्य सरकारच्या इव्हेंटसाठी असल्याचे देखील आलेमाव म्हणाले.