पणजी: कार पाठीमागे घेताना चालकाचा ताबा सुटल्याने ती अचानक पदपथावर आली आणि एका पादचाऱ्याला धडकली. यात पादचारी गंभीर जखमी झाला होता. मंगळवारी घडलेल्या या घटनेतील जखमी मुकुट बोहरा (५०, आसाम) यांचे आज गोमेकॉत निधन झाले. याप्रकरणी, पोलिसानी कारचालकास अटक केली असून हा तो मद्यधुंद अवस्थेत होता, अशी माहिती पोलिसांनी दिली आहे.

शाहिद अन्सारी (१८, रा. ताळगाव, मूळ नेपाळ) असे अटक करण्यात आलेल्या आरोपीचे नाव आहे. तो एका ‘स्पा’मध्ये कार्यरत असून, अपघाताच्या वेळी तो दारूच्या नशेत गाडी चालवत असल्याचे पोलिसांनी सांगितले. ही संपूर्ण घटना सीसीटीव्हीत कैद झाली आहे.

फुटेजनुसार, अन्सारीने प्रथम पार्किंगमधील एका दुचाकीला धडक दिली. त्यानंतर त्याने अचानक गाडी वेगाने मागे घेतली आणि ती थेट पदपथावर चढवली.

त्याच वेळी चालत असलेल्या दोन पादचाऱ्यांपैकी एकाने जीव वाचवला; परंतु बोहरा यांना सुटता आले नाही. गाडीखाली चिरडल्याने त्यांना गंभीर दुखापत झाली होती.