Tree maintenance in Panaji Smart City

पणजी: पणजी स्मार्ट सिटी मिशनअंतर्गत पहिल्या टप्प्यात करण्यात आलेल्या कामांमध्ये पदपथ आणि रस्त्याच्या मध्यभागी सुशोभित झाडे लावण्यात आली होती. आता त्यातील काही अंशी झाडे नष्ट झाली असून, जनतेच्या वर्दळीमुळे किंवा त्यांची देखभाल घेतली गेली नसल्याने ही सुशोभित झाडे नाहीशी झाल्याचे दिसते.

पहिल्या टप्प्यात दादा वैद्य रोड, बॅरोन शोरूमच्यासमोर, त्याचबरोबर बँक ऑफ बडोदा, नेपच्युन हॉटेलसमोर मिनेझिस मार्गाच्या बाजूला सुशोभित झाडांसाठी ठेवलेली जागा आता मोकळी दिसत आहे. तीच स्थिती सांतिनेजमध्येही काही ठिकाणी दिसून येत आहे. मात्र, ग्रीनरीसाठी लावलेली मोठी झाडे मात्र तग धरून आहेत.

सुशोभीकरणासाठी ठेवलेल्या जागी झाडे लावल्यानंतर तिची निगा आणि काळजी घेण्याचे काम संबंधित यंत्रणेकडून होणे अपेक्षित होते, पण तसे होताना दिसत नाही. झाडांना पाणी घातले जात असले तरी नाहीशा झालेल्या झाडांच्या ठिकाणी दुसरी झाडे आणून लावण्याचे काम झालेले नाही.