पणजी: स्वातंत्र्यदिनानिमित्त १५ ऑगस्ट २०२६ रोजी पणजीतील जुन्या सचिवालयासमोर (डी. बी. मार्ग) होणाऱ्या शासकीय सोहळ्याच्या पार्श्वभूमीवर गोवा वाहतूक पोलिसांनी विशेष ॲडव्हायझरी जारी केली आहे.

मंडपाची उभारणी आणि सुरक्षेच्या कारणास्तव शुक्रवार, १४ आणि शनिवार, १५ ऑगस्ट रोजी पणजी शहरातील वाहतुकीत महत्त्वाचे बदल करण्यात आले आहेत. स्वातंत्र्यदिन संचलनासाठी येणाऱ्या नागरिकांच्या वाहनांसाठी आबाद फारिया पुतळा ते कासा इंटरनॅशनल जंक्शनदरम्यानचा एम.जी. रोडचा भाग आरक्षित ठेवण्यात आला आहे.

१४ ऑगस्ट रोजी सकाळी ११ वाजल्यापासून भाऊसाहेब बांदोडकर पुतळा ते आबाद फारिया पुतळ्यापर्यंतचा डाव्या बाजूचा रस्ता मंडप उभारणीसाठी वाहतुकीसाठी बंद राहणार आहे. तसेच रात्री ८ वाजल्यापासून १५ ऑगस्ट रोजी स्वातंत्र्यदिनाचा कार्यक्रम संपेपर्यंत फेरी धक्का जंक्शन ते बांदोडकर पुतळ्यापर्यंतचा डी.बी. मार्ग दोन्ही बाजूंनी सर्व प्रकारच्या वाहनांसाठी पूर्णपणे बंद राहील.

नव्या पाटो पुलावरून शहरात येणारी वाहने बांदोडकर पुतळ्याजवळ डाव्या बाजूने जुन्या सचिवालयाच्या मागून जोआव कास्त्रो रोड-जुझे फाल्काव रोड येथून वाहतूक सुरळीत सुरू असेल. तसेच फेरी धक्क्यावरून शहराबाहेर जाणाऱ्या वाहनांना पोलिस मुख्यालय-शासकीय मुद्रणालय जंक्शनकडे वळवण्यात येईल. तेथून युको बँक, सरस्वती मंदिर इमारत, चर्च स्क्वेअर मार्गे जुना पाटो पूल/नवीन मळा पुलावरून वाहनांची ये-जा सुरू राहील.