मडगाव: एकाबाजूने अहमदाबाद येथील पर्यटक महिलेला दमदाटी केल्‍यामुळे गोव्‍याचे नाव संपूर्ण राष्‍ट्रीय स्‍तरावर खराब झालेले असतानाच पर्यटकांना सेवा देणाऱ्या गोवा माईल्‍सच्‍या चालकांनाही स्‍थानिक टॅक्‍सी चालकांच्‍या दादागिरीला सामोरे जावे लागते. बुधवारी पाळोळे येथे अशाचप्रकारे गोवा माईल्‍सच्‍या एका चालकाला स्‍थानिकांच्‍या मारहाणीला सामोरे जावे लागले.

गुरुवारी दक्षिण गोव्‍यातील विविध भागातील टॅक्‍सी चालकांनी दक्षिण गोवा पोलिस अधीक्षक टिकम सिंग वर्मा यांची भेट घेण्‍याचा प्रयत्‍न केला. मात्र ते नसल्‍याने मडगावचे उपअधीक्षक सिद्धांत शिरोडकर यांच्‍याकडे त्‍यांनी आपली तक्रार दाखल केली.

मागच्‍या सात दिवसांत हे प्रकार वाढले आहेत. बाणावली, वार्का, कळंगूट, बागा आणि पाळोळे या ठिकाणी गोवा माईल्‍सच्‍या टॅक्‍सी चालकांना अशा दादागिरीला तोंड द्यावे लागले आहे, असे या तक्रारीत म्‍हटले आहे.

पाळोळे येथील घटना

काही ठिकाणी स्‍थानिकांचा गट येऊन गोवा माईल्‍सच्‍या टॅक्‍सी ड्रायव्‍हरना धमकावू लागले आहेत. तुमचे टॅक्‍सी मीटर दाखवा, बॅच दाखवा असे सांगून आम्‍हाला धमकावले जाते. काहीवेळा पोलिसही आम्‍हाला हाकलून लावतात. त्‍यामुळे या सर्व बाबींवर लक्ष घालावे, असे या निवेदनात म्‍हटले आहे.