Goa Taxi Issue: 'विश्वास ठेवला अन् सरकारनं फसवलं'; टॅक्सी व्यावसायिकांची मंत्रालयाबाहेर गर्दी, सीएमनी दिला Busy असल्याचा मेसेज

पर्वरी: टॅक्सीच्या नव्या धोरणावरुन टॅक्सी व्यावसायिक पुन्हा एकदा आक्रमक झाले आहेत. नव्या धोरणाबाबत चर्चा करण्याचे सरकारने दिलेले आश्वासन पाळले नसल्याचा आरोप करत व्यावसायिकांनी बुधवारी (१० सप्टेंबर) मंत्रालयाबाहेर गर्दी केली. मुख्यमंत्र्यांनी मात्र व्यग्र असल्याचे सांगत, चर्चेसाठी पुन्हा आमंत्रण दिले जाईल, असा संदेश पोलिसांकरवी पाठवला. पण, व्यावसायिकांनी मंत्रालय परिसर सोडण्यास नकार दिला.

“टॅक्सीबाबत नवीन धोरण निश्चित करण्यासाठी टॅक्सी व्यावसायिकांसोबत चर्चा केली जाईल. यासाठी टॅक्सी व्यावसायिकांच्या प्रतिनिधींना चर्चेसाठी बोलवले जाईल, असे मुख्यमंत्री सावंत यांनी सांगितले होते. चतुर्थीच्या काळात गोड बातमी मिळेल असेही सांगण्यात आले होते. पण, १० सप्टेंबर उजाडले तरी कोणतीही स्पष्टता मिळालेली नाही. आम्ही सरकारवर विश्वास ठेवला अन् त्यांनी आम्हाला फसवलं. या विषयात आम्हाला स्पष्टता हवी आहे,” असे एका व्यावसायिकांने माध्यमांशी बोलताना सांगितले.

मुख्यमंत्री सावंत यांच्याशी चर्चा करण्याची मागणी करत असलेल्या टॅक्सी व्यावसायिकांना चर्चेसाठी दुसरा एखादा दिवस दिला जाईल, असा संदेश मुख्यमंत्र्यांनी पोलिसांकरवी दिला. मुख्यमंत्री इतर कामांमध्ये व्यस्त असल्याची माहिती डीवायएसपी करपे यांनी व्यावसायिकांना दिली. दरम्यान, मुख्यमंत्र्यांशी चर्चा केल्याशिवाय मंत्रालय परिसर सोडणार नाही, असा पवित्रा त्यांनी घेतला आहे.

“टॅक्सीचे धोरण ठरविण्यासाठी व्यावसायिकांना विश्वासात घेतले जाईल, असे स्पष्ट केले असताना मंत्रालयाबाहेर गर्दी करुन आंदोलन करण्याचे काहीच कारण नाही.  त्यांनी सरकार आणि माझ्यावर विश्वास ठेवायला हवा, आम्ही मसुद्यावर विचार करत आहोत, तो नव्याने तयार करुन प्रसिद्ध करण्यापूर्वी व्यावसायिकांना चर्चेसाठी बोलवले जाईल”, असे मुख्यमंत्री प्रमोद सावंत यांनी स्पष्ट केले आहे. 

मुख्यमंत्री प्रमोद सावंत यांनी आंदोलनकर्त्या व्यावसायिकांना विनाकारण वेळ वाया न घालविण्याचे आवाहन केले आहे. तसेच, धोरणाच्या मसुद्यावर चर्चा होईल त्यावेळी किमान २० टॅक्सी व्यावसायिकांना चर्चेसाठी बोलवले जाईल, असेही त्यांनी स्पष्ट केले.