डिचोली: धूळ प्रदूषणातून आमची सुटका करावी, प्रलंबित नुकसान भरपाई द्यावी, अन्यथा आंदोलन करणार, असा इशारा खाणग्रस्त पैरा येथील शेतकऱ्यांनी दिला आहे.

पैरा येथील साळगावकर खाण कंपनीमुळे होणाऱ्या धूळ प्रदूषणासंदर्भात पैरा कूळ संघटनेतर्फे गोवा प्रदूषण नियंत्रण मंडळाकडे तक्रार करण्यात आली होती. संबंधित तक्रारीची दखल घेत प्रदूषण नियंत्रण मंडळातर्फे बुधवारी पैरा येथील साळगावकर खाणीसह धुळीने माखलेले गावातील रस्ते आणि शेतीची पाहणी करण्यात आली.

साळगावकर खाण कंपनीचे व्यवस्थापक काळे तसेच प्रदूषण नियंत्रण मंडळाचे प्रतिनिधी प्रथमेश देसाई यांनी ही पाहणी केली. यावेळी पैरा शेतकरी कूळ संघटनेचे अध्यक्ष लक्ष्मीकांत नाईक व शेतकरी उपस्थित होते.

ग्रामस्थांना मन:स्ताप

खाण ब्लॉक-२ अंतर्गत येणारी पैरा येथील साळगावकर (पूर्वाश्रमीची चौगुले) खनिज खाणीमुळे संपूर्ण पैरा गावात धूळ प्रदूषण वाढले आहे. रस्ते धुळीने माखत असून घरातील कपडे, भांडीकुंडी आदी वस्तूंवरही धूळ साचते. त्यामुळे ग्रामस्थांना मोठा मन:स्ताप सहन करावा लागत आहे. धूळ साचल्याने शेतीही नापिक बनून पडीक पडली आहे. दिवसेंदिवस वाढणाऱ्या प्रदूषणामुळे रोगराई पसरण्याची भीतीही व्यक्त करण्यात आली आहे, अशी कैफियत लक्ष्मीकांत नाईक यांनी मांडली.

एका बाजूला धूळ प्रदूषणाचे संकट तर दुसऱ्या बाजूला संबंधित खाण कंपनीकडून शेतकऱ्यांना प्रलंबित नुकसान भरपाई देण्यास टाळाटाळ केली जात असल्याची खंत सुभाष साळगावकर यांनी व्यक्त केली. धूळ प्रदूषणातून गावची सुटका झाली नाही आणि शेतकऱ्यांना नुकसान भरपाई मिळाली नाही, तर संघटित होऊन रस्त्यावर उतरणार, असा इशारा यावेळी देण्यात आला.