डिचोली-पूरग्रस्त (Bicholim) परिस्थितीतून नागरिक सावरत असतानाच, आता डिचोलीतील बहूतेक ग्रामीण भागात हळूहळू पावसाळी (monsoon diseases) आजारांची साथ फैलावू लागली आहे. ग्रामीण भागात सध्या सर्दी-खोकला तसेच तापाची (Cold-cough fever) साथ फैलावली असून, अनेक लहान मुलांना या साथीची लागण होत आहे. विशेष करून एक ते पाच वर्षापर्यंतच्या मुलांना या साथीची लागण झाल्याचे आढळून येत आहे. (Outbreak of monsoon diseases in rural areas of bicholim)

एकाबाजूने 'कोविड' च्या तिसऱ्या लाटेचा धोका व्यक्त होत असतानाच, लहान मुलांना सर्दी, तापाचा त्रास जाणवू लागल्याने पालकांमध्ये भितीयुक्त वातावरण पसरले आहे. तरी बदलत्या हवामानामुळे ही साथ पसरल्याचे आरोग्य तज्ञांचे म्हणणे आहे. पुरामुळे निर्माण झालेल्या अस्वच्छतेमुळे त्यातच हवामानात बदल झाल्यानंतर पावसाळी आजारांसह रोगराई पसरण्याची भिती व्यक्त करण्यात येत होती. तसे संकेतही आरोग्य अधिकाऱ्यांनी पूरग्रस्त भागातील जनतेला दिले आहेत.

तपासणीसाठी डॉक्टरांकडे धाव

डिचोली शहरासह तालुक्यातील सर्वण तसेच पुराचा तडाखा बसलेल्या ग्रामीण भागात सध्या सर्दी-तापाची साथ फैलावत असून, अनेक लहान मुलांना या साथीची लागण झाली आहे. साथीची लागण झालेल्या बालकांना घेवून सध्या तपासणीसाठी पालक सामाजिक आरोग्य केंद्रांसह खाजगी डॉक्टरांकडे धाव घेत असल्याचे आढळून येत आहे.

पावसाळी आजार

पुरामुळे निर्माण झालेली अस्वच्छता त्यातच हवामानात बदल झाल्यानंतर सर्दी-ताप आणि अतिसार यासारख्या आजारांची साथ पसरण्याची शक्यता डिचोली सामाजिक आरोग्य केंद्राची आरोग्य अधिकारी डॉ. मेधा साळकर यांनी आठवड्यापूर्वी वर्तविली होती. जनतेने आवश्यक ती काळजी घेण्याचे आवाहनही त्यांनी केले होते. पूरग्रस्त साळ आदी भागात फॉगिंग करून प्राथमिक औषधांचे वाटपही केले आहे. बदलत्या हवामानामुळे पावसाळी आजार बळावण्याची शक्यताही त्यांनी व्यक्त केली आहे.

वैद्यकीय सल्ला घ्या

हवामानात बदल झाला की, पावसाळी आजार डोके वर काढतात. सध्या लहान मुलांना सर्दी-ताप संसर्गाची लागण होत असली, तरी पालकांनी घाबरून न जाता आणि गाफिल न राहता वैद्यकीय सल्ला घ्यावा. बदलत्या हवामानामुळे सर्दी-तापाची साथ फैलावली आहे.

-डॉ. शेखर साळकर, तज्ज्ञ डॉक्टर.