फोंडा: ज्यादा पैशांचा परतावा मिळवून देण्याचे आमिष दाखवून नागरिकांना लुबाडण्याचे ऑनलाईन फसवणुकीचे प्रकार राज्यात वाढत आहेत. फोंडा तालुक्यात गेल्या सहा महिन्यांत अशा फसवणुकीच्या घटनांमधून नागरिकांनी तब्बल १५ लाख रुपये गमावले आहेत.

फोंडा आणि म्हार्दोळ पोलिस स्थानकात ऑनलाईन फसवणुकीच्या तक्रारी दाखल होण्याचे प्रकार वाढले असून म्हार्दोळ पोलिस स्थानकात सर्वात जास्त प्रकरणांची नोंद झाली आहे. गेल्या आठवड्यात तर दोघाजणांनी अशा तक्रारी केल्या आहेत, ज्यातून साडेपाच लाख रुपयांची फसवणूक झाल्याचे म्हटले आहे.

फोंडा आणि म्हार्दोळ मिळून हा फसवणुकीचा आकडा किमान पंधरा लाख रुपये असून यातील काहीजणांनी लाजेपोटी तक्रारी करण्याचे सोडून दिले आहे. म्हार्दोळ पोलिस स्थानकात गेल्या ८ तारखेला व नंतर १२ तारखेला असा प्रकार घडल्याची नोंद झाली आहे. विशेषतः माशेल भागातील लोक जे परप्रांतीय आहेत, अशा ऑनलाईन प्रकरणांत बळी पडत आहेत.

‘१९३०’वर करा संपर्क

केंद्र सरकारने अशी फसवणुकीची प्रकरणे गंभीरपणे घेतली असून ऑनलाईन फसवणूक झाल्यास ‘१९३०’ या क्रमांकावर संपर्क साधण्याचे आवाहन करण्यात येत आहे. यावर मार्गदर्शन आवश्यक आहे.

काही वर्षांपूर्वी पाच वर्षांत पैसे डबल करून मिळतील, अशी जाहिरताबाजी करून लोकांकडून ठेवी जमा केल्यानंतर अशा ठेवी घेऊन पोबारा करण्याचा प्रकार घडले होते. आता ऑनलाईन फसवणुकीचे प्रकार वारंवार होत असून लोक काही सुधारत नाहीत.

- विराज नाईक, कुर्टी-फोंडा

चोरट्यांकडून चोरीच्या नवनव्या क्लृप्त्या शोधून काढल्या जात आहेत. त्यामुळे ग्राहकांनी सावध राहिले पाहिजे. अशा फसवणुकीच्या प्रकरणांवरील जागृतीत युवावर्गाचा भरणा असल्यास या युवकांकडून आपले घर आणि वाड्यावर जनजागृती होणे शक्य आहे.

- नरेश नाईक, ढवळी-फोंडा