Goa Crime News

मडगाव: गोहत्या आणि गोमांस विक्रीप्रकरणी चांदोर येथून एकाला अटक करण्यात आली आहे. मायणा कुडतरी पोलिसांनी रविवारी (०१ डिसेंबर) ही कारवाई केली. चांदोर येथे २९ नोव्हेंबर सकाळी सहा ते ९ च्या दरम्यान ही घटना घडली.

मलिकजान बेपारी असे अटक करण्यात आलेल्या संशयित आरोपीचे नाव आहे. पोलिसांनी दिलेल्या माहितीनुसार, संशयित आरोपीकडे एक गाय आढळून आली. गायीची कत्तल करुन त्यानंतर मांसाची अवैधपणे विक्री करताना बेपारी आढळून आल्याचे पोलिसांनी म्हटले आहे.

संशयित बेपारीने गुरांचे रक्षण करणाऱ्या आणि प्राण्यांवरील क्रूरता रोखणाऱ्या राज्य कायद्यांचे उल्लंघन केले, असे पोलिसांनी सांगितले.

मलिकजान बेपारी विरोधात बीएनएसच्या कलम ३२५, गोवा, दमण आणि दीव गोहत्या प्रतिबंधक कायदा कलम ३, ५ आणि ८ यासह प्राण्यांवर क्रूरता कायदा आणि गोवा प्राणी संरक्षण कलम 4, 5, 8 आणि 10 अंतर्गत मायणा कुडतरी पोलीस ठाण्यात गुन्हा दाखल करण्यात आला आहे.

आरोपीला मडगाव येथील प्रथमवर्ग न्यायदंडाधिकारी यांच्यासमोर हजर केले असता त्याला चार दिवसांची पोलिस कोठडी सुनावण्यात आली आहे.