पणजी: मूळ कळपापासून विभक्त होऊन गोवा-महाराष्‍ट्रातील सीमा भागात हेलपाटे मारणाऱ्या ‘ओंकार’ हत्तीला गोव्‍यातून महाराष्‍ट्रात घालविण्‍यासाठी गोवा वन खात्‍याकडून जोरदार प्रयत्‍न सुरू असतानाच, महाराष्‍ट्र वन खात्‍याचे सुमारे दहा कर्मचारी ‘ओंकार’ने महाराष्‍ट्रात प्रवेश करू नये, यासाठी सीमेवर मुक्‍काम ठोकून पहारा देत आहेत.

त्‍यामुळे ओंकारचा गोवा आणि महाराष्‍ट्रात पुरता फुटबॉल झाला आहे. महाराष्‍ट्रातील ओंकार हत्ती कळपापासून विभक्त झाल्‍यानंतर गोव्‍यात दाखल झाला. पेडणे परिसरातील काहीजणांच्‍या शेतीचीही त्‍याने नासधूस केली.

त्‍यामुळे गोवा वन खात्‍याने या हत्तीला महाराष्‍ट्रातील दोडामार्ग भागामध्‍ये परतवण्‍यासाठी प्रयत्‍न सुरू केले; परंतु या हत्तीने गेले काही दिवस गोव्‍यातून दोडामार्ग आणि दोडामार्गमधून गोवा असा प्रवास सुरू ठेवला.

गेल्‍या तीन-चार दिवसांपासून त्‍याने तांबोसे येथे मुक्काम ठोकला असल्‍याची माहिती सरकारी सूत्रांनी गुरुवारी ‘गोमन्‍तक’शी बोलताना दिली. महाराष्‍ट्र वन खात्‍याचे सुमारे दहा कर्मचारी सीमेवर पहारा देत आहेत, असेही सूत्रांनी सांगितले.

ओंकार हत्तीबाबत वनमंत्री विश्‍‍वजीत राणे यांनी माझ्याशी चर्चा केली आहे. गोव्‍याच्‍या हद्दीत आलेल्‍या हत्तीला महाराष्‍ट्र वन खात्‍याच्‍या मदतीने सुरक्षितस्‍थळी नेऊन सोडण्‍याचे निर्देश वन खात्‍याच्‍या अधिकाऱ्यांना देण्‍यात आले आहेत.

- डॉ. प्रमोद सावंत, मुख्‍यमंत्री.