पेडणे: ओंकार हत्तीने पेडण्यातील तांबोशी, उगवे आणि मोपा अशा तीन गावांतील सुमारे ३० शेतकऱ्यांच्या शेतीचं मोठ्या प्रमाणात नुकसान केलंय. मोठ्या प्रमाणावर पिकांचे नुकसान झाल्याने शेतकरी हवालदिल झाले आहेत. याबाबत कृषी अधिकाऱ्यांनी नुकसानीची पाहणी करून अहवाल तयार करण्याचे काम सुरू केले आहे.

या अहवालानंतर बाधित शेतकऱ्यांना शेतकरी आधार निधीच्या माध्यमातून भरपाई देण्यात येईल, अशी माहिती कृषी संचालक संदीप फळदेसाई यांनी दिली.

फळदेसाई म्हणाले, “सध्या उपलब्ध माहितीनुसार तांबोशी गावातील शेतकऱ्यांचे सर्वाधिक नुकसान झाले आहे. परंतु येत्या दोन-चार दिवसांत पडताळणी पूर्ण झाल्यानंतर नेमकी स्थिती स्पष्ट होईल. नुकसान किती झाले याचा तपशीलवार अहवाल मिळाल्यावर त्यानुसार शेतकऱ्यांना नुकसानभरपाई दिली जाईल.”

दरम्यान, ‘ओंकार’ हत्तीमुळे शेतकऱ्यांचे सातत्याने होणारे नुकसान आणि त्रास कमी करण्यासाठी वनखात्याकडून विविध प्रयत्न करण्यात आले होते. त्यावेळी कृषी खात्याने देखील आवश्यक त्या सोयी-सुविधांसाठी, विशेषतः रस्ता मोकळा करण्यासाठी ट्रॅक्टरच्या मागणीबाबत पाठपुरावा केला होता, अशी माहितीही त्यांनी दिली.

‘ओंकार’ हत्तीमुळे झालेल्या या नुकसानीमुळे पेडण्यातील शेतकरी पुन्हा एकदा भरपाईच्या प्रतिक्षेत आहेत. स्थानिक पातळीवर शेतकऱ्यांची बैठक घेऊन या संदर्भातील पुढील उपाययोजना ठरवली जाणार आहे.