मडगाव: डॉ. केतन भाटीकर यांच्या संशयास्पद मृत्यूप्रकरणी आता कर्नाटक पोलिसांनी तपास सुरू केला आहे. रामनगर पोलिस स्थानकाने या प्रकरणाची अधिकृत फाईल उघडली आहे. डॉ. भाटीकर यांचा मागील आठवड्यात सर्पदंशामुळे मृत्यू झाला होता. ही घटना अनमोड घाट परिसरात घडली होती, जो रामनगर पोलिस स्थानकाच्या हद्दीत येतो.

मात्र, त्यांचा मृत्यू झाल्याचे गोव्यात आणल्यानंतर जाहीर करण्यात आले होते. या घटनेचे गांभीर्य लक्षात घेऊन माजी मंत्री मिकी पाशेको यांनी रामनगर पोलिस स्थानकात तक्रार दाखल केली होती. घटनेचे मूळ ठिकाण कर्नाटक राज्याच्या हद्दीत असल्याने या प्रकरणाचा तपास कर्नाटक पोलिसांनी करावा, अशी मागणी त्यांनी केली होती.

मिळालेल्या माहितीनुसार, रामनगर पोलिसांनी या तक्रारीची दखल घेत तपास प्रक्रिया सुरू केली असून त्यासंदर्भातील पोचपावतीही पाशेको यांना देण्यात आली आहे. दरम्यान, या प्रकरणात सखोल चौकशी व्हावी, अशी मागणी सामाजिक कार्यकर्ते राधाराव ग्रासियस यांनीही केली आहे. ही मागणी पुढे नेण्यासाठी काही जण मुंबई उच्च न्यायालयात जाण्याची तयारी करत असल्याची माहिती त्यांनी दिली.