म्हापसा: कारागृहातील एकाच ब्लॉकमध्ये बंदिस्त असलेल्या कैद्यांमध्ये अंतर्गत वाद उफाळून आल्याने अंडर ट्रायल कैदी राकेश पाटील याला इतर कैद्यांनी बेदम मारहाण केली. ही खळबळजनक घटना आज सायंकाळच्या सुमारास उघडकीस आली. संबंधित आरोपी आणि पीडित कैदी राकेश पाटील हे कारागृहातील एकाच ब्लॉक सुरक्षिततेत एकत्र राहत होते.

आज संध्याकाळी त्यांच्यामध्ये अचानक जोरदार वाद झाला. आरोपीने राकेश पाटील याच्यावर जोरात हल्ला चढविला. आरोपीने पाटील याच्या चेहऱ्यावर आणि डोळ्याजवळ जोरदार ठोसे मारल्याने त्याच्या डोळ्याच्या बाजूला गंभीर दुखापत झाली आहे. जबर मारहाणीमुळे त्याच्या नाकातून रक्त वाहत होते. याप्रकरणी कोलवाळ पोलिसांत रात्री उशिरापर्यंत तक्रार नोंद केलेली नव्हती.

जखमी कैद्यावर गोमेकॉत उपचार

मारहाणीचा हा प्रकार लक्षात येताच तुरुंग व्यवस्थापनात एकच खळबळ उडाली आणि सुरक्षा रक्षकांनी तात्काळ धाव घेत परिस्थिती नियंत्रणात आणली. या हल्ल्यात जखमी झालेल्या राकेश पाटील याला तातडीने कारागृहातून बाहेर काढून उपचारासाठी आधी म्हापसा येथील उत्तर गोवा जिल्हा रुग्णालयात आणि तेथून पुढे गोमेकॉत दाखल करण्यात आले असून, सध्या त्याच्यावर उपचार सुरू आहेत. या घटनेमुळे कारागृहातील सुरक्षेचा प्रश्न पुन्हा एकदा ऐरणीवर आला आहे.