Goa crime: मुलीशी लग्नास विरोध केल्यानेच खून; चिकणे-कुडणेतील महिलेच्या हत्येचा झाला उलगडा, संशयिताला मुंबईत ठोकल्या बेड्या

साखळी: चिकणे-कुडणे येथील शैला संजय घाडी या ५८ वर्षीय महिलेचा खून करून फरार झालेल्या सागर रमेश राऊळ (वय ३४ वर्षे, रा. सावंतवाडी) या संशयिताला मुंबई पोलिसांच्या सहकार्याने अटक करण्यात डिचोली पोलिसांना यश आले. घाडी यांच्या धाकट्या मुलीशी विवाहाला नकार दिल्याने सागरने हे कृत्य केले.

संशयित सागर याला मीरा भाईंदर-ठाणे येथील प्रथम श्रेणी न्यायालयात ट्रान्झिट रिमांडसाठी हजर केले. सर्व कायदेशीर प्रक्रिया पूर्ण करून डिचोली पोलिस स्थानकात आणणार असल्याची माहिती डिचोली पोलिस स्थानकातून देण्यात आली. खून केल्यानंतर घटनास्थळावरून पळून गेलेल्या सागरच्या शोधासाठी डिचोलीचे पोलिस निरीक्षक विजय राणे यांच्या नेतृत्वाखाली दोन पथके तयार केली.

पहिल्या पथकात उपनिरीक्षक विराज धावस्कर, पोलिस कॉन्स्टेबल विशाल परब, अंकित बाळे, नरेंद्र साळस्कर तर दुसऱ्या पथकात पोलिस उपनिरीक्षक आकाश परवार, हवालदार समीर गावस, पोलिस कॉन्स्टेबल नारायण नागवेकर, दानिश शेख यांचा समावेश होता. सागरच्या शोधात ही पथके सावंतवाडी, कोल्हापूर, मुंबईसह इतर जवळपासच्या परिसरामध्ये फिरत होती.

तांत्रिक माध्यमांचा योग्य वापर तसेच महाराष्ट्रातील वसई-विरार पोलिस आयुक्तालयाच्या मीरा-भाईंदर येथील गुन्हा शाखा युनिट चारच्या पोलिसांचे सहकार्य घेऊन सागरला बुधवारी (ता.२०) संध्याकाळी ५.३० वाजता ठाणे येथील द्वारका हॉटेलजवळ ताब्यात घेतले. अटक केल्यानंतर आज मीरा-भाईंदर येथील प्रथम श्रेणी न्यायालयात ट्रान्झिट रिमांडसाठी संशयिताला हजर केले. सर्व कायदेशीर प्रक्रिया पूर्ण केल्यानंतर त्याला डिचोली पोलिस स्थानकात आणण्यात येणार आहे.

उत्तर गोवा पोलिस अधीक्षक हरीश मडकईकर, डिचोलीच्या पोलिस उपअधीक्षक श्रीदेवी बी.व्ही. यांच्या मार्गदर्शनाखाली पोलिस निरीक्षक विजय राणे सरदेसाई आणि सहकाऱ्यांनी ही मोहीम यशस्वी केली. पोलिस निरीक्षक विजय राणे पुढील तपास करीत आहेत.

जाता जाता दिली जीवे मारण्याची धमकी

याप्रकरणी शैला घाडी यांचे पुत्र शुभम संजय घाडी यांच्याकडून डिचोली पोलिसांना मिळालेल्या माहितीनुसार, संशयित सागर याने शैला यांच्या धाकट्या मुलीसोबत लग्न करण्याचा प्रस्ताव मांडला होता; परंतु या प्रस्तावास घाडी यांच्या घरच्यांकडून नकार मिळाल्याने रागाने सागरने शैला यांना जबर मारहाण केली. त्यातच त्यांचा मृत्यू झाला. खून केल्यानंतर पळून जाताना सागरने घरातील इतरांनाही जीवे मारण्याची धमकी दिली होती.