डिचोली: डिचोली येथील तात्पुरत्या बसस्थानकात वाढत्या बेशिस्तपणामुळे, तसेच वाहतुकीमुळे रहदारीची गंभीर समस्या निर्माण झाली आहे. यामुळे प्रवासी तसेच वाहनचालकांमध्ये चिंतेचे वातावरण आहे. विशेषतः सकाळी आणि सायंकाळच्या गर्दीच्या वेळेत वाहतूक कोंडीचे प्रकार सातत्याने घडत आहेत. हा प्रकार दररोज होत आहे.

एखाद्या गंभीर अपघाताची शक्यताही व्यक्त केली जात आहे.सकाळी साडेसात ते नऊ आणि सायंकाळी सहा वाजल्यानंतर बसस्थानक परिसरात मोठ्या प्रमाणात बसगाड्यांची वर्दळ वाढते. आधीच तात्पुरत्या बसस्थानकासाठी उपलब्ध असलेली जागा अपुरी पडत असल्याने, एकाच वेळी तीन ते चार बसगाड्या आल्यास परिसरात गोंधळाची स्थिती निर्माण होते.

बसगाड्या अनेकदा आडव्यातिडव्या पद्धतीने उभ्या केल्या जात असल्याने इतर बसगाड्यांना स्थानकात प्रवेश करणे आणि बाहेर पडणे कठीण होते.यातच काही वाहनचालकांकडून बसस्थानकाजवळील ‘नो पार्किंग’ क्षेत्रातही बेशिस्तपणे वाहने उभी केली जात आहेत. त्यामुळे बाजाराच्या दिशेने जाणाऱ्या रस्त्यावर वाहतुकीचा वेग मंदावून वाहने अडकून पडतात. परिणामी, प्रवाशांसह अन्य वाहनधारकांनाही मोठ्या गैरसोयीला सामोरे जावे लागत आहे.

उपाय योजना करा!

बसस्थानक परिसरातील ही परिस्थिती दिवसेंदिवस गंभीर बनत चालली असून, संबंधित विभागाने तातडीने वाहतूक नियंत्रणासाठी उपाययोजना कराव्यात, अशी मागणी प्रवासी आणि स्थानिकांकडून होत आहे. अन्यथा भविष्यात गंभीर दुर्घटना घडण्याची भीती व्यक्त केली जात आहे.