पणजी: राष्‍ट्रीय महामार्गाच्‍या रुंदीकरणात भोममधील धार्मिक किंवा वारसास्‍थळांचे कोणतेही नुकसान होणार नाही, अशी हमी केंद्रीय रस्‍ते वाहतूक मंत्री नितीन गडकरी यांनी लोकसभेतील लेखी प्रश्‍‍नाच्‍या उत्तरातून दिली आहे. दक्षिण गोव्‍याचे खासदार कॅ. विरियातो फर्नांडिस यांनी याबाबतचा प्रश्‍‍न विचारला होता.

गोव्यातील फोंडा तालुक्यातील भोम गावातून जाणाऱ्या राष्ट्रीय महामार्गाचा विस्‍तार प्रादेशिक आराखडा २०२१ मध्ये दाखवण्‍यात आलेल्‍या संरेखनांनुसार होणार आहे का? या भागात धार्मिक आणि वारसा स्‍थळे असूनही केंद्र सरकारने विद्यमान संरेखन चालू ठेवले आहे का?

या मार्गाच्‍या विस्‍तारासाठी सरकारने खाजन जमिनींचा विचार केला होता का? असे प्रश्‍‍न खासदार फर्नांडिस यांनी विचारले होते. त्‍यावर उत्तर देताना, ‘गोव्यातील राष्ट्रीय महामार्ग-७४८ या विस्‍तारात फोंडा तालुक्यातून जाणाऱ्या भागाचा समावेश होतो.

२०२१ च्या प्रादेशिक आराखड्यातील पर्यायांचा विचार करूनच विस्‍ताराच्‍या कामास मंजुरी देण्‍यात आली आहे. महामार्गाचे विस्‍तारीकरण होताना भोममधील धार्मिक किंवा वारसा स्‍थळांचे कोणतेही नुकसान होणार नाही’, असे मंत्री गडकरी यांनी उत्तरात म्‍हटले आहे.