पणजी: गोव्‍यातील दाबोळी विमानतळावरील नागरी तसेच व्यावसायिक विमानसेवा थांबवण्याबाबत किंवा या विमानतळाचा दर्जा बदलून तो ‘देशांतर्गत विमानतळ’ करण्याचा कोणताही प्रस्ताव विचाराधीन नाही, असे केंद्रीय नागरी विमानोड्डाण राज्‍यमंत्री मुरलीधर मोहोळ यांनी लोकसभेतील लेखी प्रश्‍‍नाला दिलेल्‍या उत्तरात स्‍पष्‍ट केले आहे.

खासदार विरियातो फर्नांडिस यांनी याबाबतचा प्रश्‍‍न विचारला होता. दाबोळी विमानतळावरील नागरी तसेच व्यावसायिक विमानसेवा थांबवण्याबाबत कोणता प्रस्ताव विचाराधीन आहे का? असल्यास, हा निर्णय घेण्‍याचे कारण काय आहे? अशा निर्णयाबाबत गोवा सरकारशी सल्लामसलत केली का? नागरी विमानसेवेसाठी दाबोळी विमानतळाचे स्वरूप केवळ ‘देशांतर्गत विमानतळा’पुरते मर्यादित करण्याचा सरकारचा प्रस्ताव आहे का? दाबोळी विमानतळ लष्करी आणि नागरी अशा दोन्ही प्रकारच्या विमान वापरासाठी कार्यरत ठेवण्याबाबत सरकारने यापूर्वी कोणताही निर्णय घेतला होता का? असे प्रश्‍‍न खासदार फर्नांडिस यांनी विचारले होते.

फर्नांडिस यांच्‍या प्रश्‍‍नांना उत्तरे देताना, दाबोळी हा आंतरराष्ट्रीय विमानतळ असून, तो भारतीय नौदलाच्या मालकीचा आहे. भारतीय विमानतळ प्राधिकरण तेथील नागरी विभागाची देखभाल करत असून, या विमानतळावर लष्करी आणि नागरी अशा दोन्ही प्रकारच्या विमानसेवांचे कामकाज चालते, असे मंत्री मोहोळ यांनी म्‍हटले आहे.

‘दाबोळी’वरून घमासान सुरूच

राज्‍यात मोपा येथे मनोहर आंतरराष्‍ट्रीय विमानतळ सुरू झाल्‍यापासून केंद्र सरकार दाबोळी विमानतळ बंद करण्‍याच्‍या तयारीत असल्‍याचा दावा विरोधी आमदारांकडून वारंवार करण्‍यात येत आहे. यावरून गेल्‍या काही वर्षांत झालेल्‍या विधानसभा अधिवेशनांतही सत्ताधारी आणि विरोधकांत जुंपली होती. परंतु, राज्‍यात येणाऱ्या पर्यटकांत वाढ होत असल्‍यामुळे दोन्‍ही विमानतळांची राज्‍याला गरज आहे. त्‍यामुळे दाबोळी अजिबात बंद होणार नसल्‍याची हमी मुख्‍यमंत्री डॉ. प्रमोद सावंत यांनीही दिली होती.