मडगाव: मागचा काही काळ मडगाव परिसर गॅंगवारपासून मुक्त होता. मात्र, आज (12 ऑगस्ट) पहाटे पुन्हा एकदा मडगावात गॅंगवॉरचा उद्रेक झाला. पहाटे 2.45 वाजण्याच्या सुमारास गाडीतून जाणाऱ्या दोन युवकांचा अन्य चार जणांनी पाठलाग करुन मुंगूल येथे अडवून त्यांच्यावर गोळीबार केला. ही घटना मुंगुल (मडगाव) परिसरात घडली. या गंभीर गुन्ह्याप्रकरणी आता पोलिसांनी सात जणांना बेड्या ठोकल्या.

दरम्यान, या प्रकरणात रफिक तशान (24) आणि युवकेश तशान (20) हे दोघेजण गंभीर जखमी झाल्याने त्यांना 'गोमेकॉत हलविण्यात आले. या प्रकरणात फातोर्डा पोलिसांनी पाच जणांविरोधात लुकआऊट नोटीस जारी केली आहे. जखमी रफिक आणि युवकेश हे दोघेही वॉल्टर गॅंगशी संबंधित असून पूर्वाश्रमीच्या भांडणांतून हा हल्ला केल्याचे सांगितले जात असून या प्रकरणात फातोर्डा पोलिसांनी अक्षय तलवार, राहुल तलवार (दोघेही बडे-मडगाव), विल्सन कार्व्हालो, शाहरुख (दवली) आणि रसूल या पाच जणांविरोधात लुकआऊट नोटीस जारी केली. याशिवाय, आणखी सुमारे 15 अज्ञात संशयितांच्या विरोधात खुनी हल्ला केल्याचा गुन्हा नोंद केला.

पोलिसांनी दिलेल्या माहितीनुसार, हल्ला करणाऱ्यांनी तोंडावर बुरखा घातला होता. त्यांनी रफीक आणि युवकेशवर सोडा बॉटल आणि कोयत्याने हल्ला चढवला, यातील एका बुरखाधारी संशयिताने दोनदा गोळीबार केला. मात्र, या गोळ्या गाडीच्या काचेला लागून काच फुटली. त्यानंतर हल्ला करणारे घटनास्थळाहून पळून गेले. मुंगूल-फातोर्डा येथील शगून रेस्टॉरंटजवळ हे टोळीयुद्ध भडकले. त्यात रफीक आणि युवकेशच्या गाडीचेही मोठ्या प्रमाणावर नुकसान झाले.

दुसरीकडे, हा हल्ला नेमका कुठल्या कारणामुळे झाला हे अद्याप स्पष्ट झाले नसून दोन गुन्हेगारी गॅंगमधील हा आप आपसातील वाद असल्याची शक्यता पोलिसांनी वर्तवली आहे.