Mormugao Municipality: सडा येथे कचरा प्रक्रिया प्रकल्पातील कचरा लगतच्या रस्त्यावर पसरल्याने सामाजिक कार्यकर्ते शंकर पोळजी यांनी संताप व्यक्त केला. रस्त्यावर कचरा पसरविणे हा 'स्वच्छ भारत अभियान' आहे काय? असा सवाल त्यांनी उपस्थित केला.

सडा भागात मुरगाव पालिकेचा कचरा (Garbage) प्रक्रिया प्रकल्प आहे. मुरगाव पालिका (Mormugao Municipality) क्षेत्रातील ओला व सुका कचरा गोळा करून या प्रकल्पामध्ये ओतण्यात येतो. तसेच चिखली पंचायतीचा कचराही येथे ओतण्यात येतो. या प्रकल्पातील कचऱ्यावर जलदगतीने प्रक्रिया होत नसल्याने कचरा साठविला जातो. त्यामुळे तेथे कचऱ्याचे ढीग तयार होतात.

मध्यंतरी सर्व ढीग हटविण्यात आले होते. परंतु, आता पुन्हा कचरा प्रक्रिया प्रकल्पातून कचरा बाहेरच्या रस्त्यावर येऊ लागला आहे. त्यामुळे तेथे भटकी जनावरे, कुत्री जमा होत असल्याने तसेच दुर्गंधी पसरल्याने नागरिकांना या रस्त्यावरून येणे-जाणे त्रासदायक ठरत आहे. सदर कचरा कुंपणाबाहे तसेच रस्त्यावर टाकण्यात आल्यावर तो पुन्हा प्रकल्पाच्या आतमध्ये टाकण्यासाठी हालचाल करण्याची गरज पोळजी यांनी व्यक्त केली.