वास्को: मुरगाव नगरपालिका क्षेत्रातील वीज खांबावर विविध इंटरनेट केबल टाकून मोठ्या प्रमाणात बेकायदेशीरपणे अतिक्रमण केले असून, लवकरच सर्व खांबावरील इंटरनेट केबल कापून टाकण्याचे आदेश पालिकेतर्फे देण्यात आले आहे. (Mormugao municipality will cut the internet cable on the power pole )

काही दिवसांपूर्वी वास्को स्वतंत्र पथ मार्ग, मॉडर्न मार्केट समोर इंटरनेट केबल रस्त्यावर सांडल्याने एका मुलाच्या पायाखाली केबल आल्याने तो रस्त्यावर पडला होता. सुदैवाने त्याचवेळी रस्त्यावर वाहनाची वर्दळ नसल्याने मोठा अनर्थ टळला. सध्या हे सर्व केबल पादचाऱ्यांबरोबर वाहन चालकांना डोकेदुखी ठरली असल्याने, पालिकेने शहरातील सर्व खांबावरील केबलवर कारवाई करण्याचे आदेश जारी केले आहे.

वास्को भागात अनेक ठिकाणी वीज विभागाच्या खांबावर मुरगाव नगरपालिकेची परवानगी नसताना टाकलेले सर्व इंटरनेट व इतर केबल त्वरित काढण्याचे आदेश मुरगाव नगरपालिका अधिकाऱ्यामार्फत देण्यात आले आहे. वास्कोतील स्वतंत्र पथ मार्गावरील वीज खांबावर विजेच्या वाहिन्याबरोबर विविध कंपन्यांचे इंटरनेट केबल असून यातील बहुतेक केबल तुटून रस्त्यावर पडल्याने पादचारी, वाहन चालकांना धोकादायक ठरत आहे.

यामुळे रस्त्यावरून जाताना दुचाकी वाहन वाहनांना या केबलमुळे अपघात होण्याची शक्यता नाकारता येत नाही. यासाठी पालिका व वीज विभागाने वरील खांबावरील केबल त्वरित काढावे अशी मागणी समाज कार्यकर्ते शंकर पोळजी यांनी केली होती.

दरम्यान वाढत्या तक्रारीची दखल घेत मुरगाव नगरपालिका अधिकाऱ्यांनी स्वतंत्र पथ, एफएल गोम्स दत्तात्रेय मार्गाबरोबर इतर रस्त्यावरील सर्व केबल काढण्याचे आदेश जारी केले आहे. रस्त्यावर पडलेल्या केबलमुळे पादचाऱ्यांना खूप त्रासदायक ठरल्या असल्याने अखेर पालिकेने केबल कापून टाकण्याचे आदेश जारी केले आहे.