Vijai Sardesai On Ramdas Athawale: गोव्यात एसटी समुदायाची लोकसंख्या कमी आहे. त्यामुळे त्यांना आरक्षण मिळणे कठीण आहे, असे वक्तव्य गोव्याच्या दौऱ्यावर असलेले केंद्रीय सामाजिक न्याय राज्य मंत्री रामदास आठवले यांनी केले होते.

त्याचे पडसाद आता गोव्याच्या राजकारणात उमटू लागले आहेत. गोवा फॉरवर्ड पक्षाचे अध्यक्ष आणि फातोर्डाचे आमदार विजय सरदेसाई यांनी यावरून भाजप सरकारला टीकेचे लक्ष्य केले आहे.

आमदार सरदेसाई म्हणाले की, हा जोक आहे की हीच भाजप सरकारची पॉलिसी आहे? केंद्रीय सामाजिक न्याय राज्य मंत्री रामदास आठवले म्हणतात की, गोव्यात एसटी समुदायाला आरक्षण मिळणे शक्य नाही. हे वक्तव्य धक्कादायक आणि संशयास्पद आहे. केंद्रीय मंत्र्यांचे हे वक्तव्य गंभीर आहे.

गोवा विधानसभेने एकमताने गोवा सरकारला विनंती केली होती की, केंद्र सरकारकडे एसटी आरक्षणासाठी पाठपुरावा करावा. या प्रलंबित प्रश्नाच्या सोडवणुकीसाठी पावले उचलावलीत. शक्य तितक्या लवकर या समाजाला आरक्षण द्यावे.

तथापि, आता खुद्द केंद्रीय मंत्रीच याविरोधात बोलत आहेत. त्यामुळे गोवा भाजपने आणि गोवा मुख्यमंत्री कार्यालयाने याबाबत तत्काळ स्पष्टीकरण दिले पाहिजे. राज्य सरकारने याबाबत भूमिका स्पष्ट केली पाहिजे.

गोव्याच्या नागरिकांना कळले पाहिजे, गोवा सरकारची भूमिका काय आहे. डबल इंजिन सरकार पुन्हा एसटी समुदायाची फसवणूक करणार आहे का? असा सवालही विजय सरदेसाई यांनी केला आहे.