मडगाव: रक्ताच्या नात्याला काळिमा फासणारी घटना फातोर्डा पोलिस ठाण्याच्या हद्दीत घडली असून, सख्ख्या काकानेच दोन अल्पवयीन पुतण्यांवर लैंगिक अत्याचार केल्याचे उघड झाले. नराधम काकाच्या हाती पोलिसांनी बेड्या ठोकून त्याला गजाआड केले आहे.

चोंदूला ऊर्फ चंदू सोरेन (वय ५१ वर्षे) असे या संशयिताचे नाव आहे. पीडित मुलींच्या आईने याप्रकरणी पोलिसांत तक्रार नोंदविल्यानंतर फातोर्डा पोलिसांनी त्वरित कारवाई करून संशयिताला अटक केली. त्याची सध्या चौकशी सुरू असल्याची माहिती फातोर्डा पोलिस ठाण्याचे निरीक्षक नॅथन आल्मेदा यांनी दिली. संशयित झारखंड राज्यातील आहे.

या दोन्ही मुली अवघ्या आठ आणि नऊ वर्षांच्या असून, त्यांनाच चंदूने वासनेचे शिकार बनविले. संशयित चंदूवर पोस्को कायदा व गोवा बाल कायदा कलम ८ अंतर्गत पोलिसांनी गुन्हा नोंद केला आहे. 'बायलांचो एकवोट' संघटनेच्या अध्यक्ष आवदा व्हिएगस यांनी ही घटना अत्यंत धक्कादायक असल्याचे सांगितले.

प्ररप्रांतीय कामगारांना आणताना त्यांच्या मुलांची देखभाल करण्यासाठी ठेकेदारानेही उपाययोजना करण्याची नितांत गरज आहे. अशा प्रकारच्या वाढत्या गुन्ह्यांवर सर्वांनीच विचार करण्याची वेळ आली असल्याचे त्या म्हणाल्या.

चिमुकल्यांना जीवे मारण्याची धमकी

पीडित मुलींची आई कामानिमित्त हल्लीच बाहेरगावी गेली होती. त्यावेळी तो त्यांना शाळेतून आणताना चंदू त्यांच्याशी लैंगिक चाळे करीत होता, असे पोलिस तपासात आढळून आले आहे. या प्रकरणाची कुठेही वाच्यता केल्यास तुम्हाला कायमचे संपवून टाकू, अशी धमकीही त्याने मुलींना दिली होती. मार्च व एप्रिल महिन्यांत त्याने या निरपराध चिमुरड्यांवर लैंगिक अत्याचार केले.