पणजी: महाराष्ट्रातून गोव्यात येऊन धुमाकूळ घालणाऱ्या ‘ओंकार’ हत्तीला कर्नाटकमध्ये पुनर्वसन करण्यासाठी आता हालचाली सुरू झाल्या आहेत. मंत्री विश्वजित राणे यांनी शनिवारी (२० सप्टेंबर) कर्नाटकचे वनमंत्री ईश्वर खांद्रे यांची भेट घेऊन या ‘ओंकार’ हत्तीच्या पुनर्वसनाबाबत चर्चा केली.

बैठकीत मंत्री राणे यांनी ‘ओंकार’ हत्तीला लवकरात लवकर सुरक्षित आणि योग्य ठिकाणी पुनर्वसन करण्यासाठी त्वरित पावले उचलण्याची मागणी केली. या संदर्भात तीन राज्यांमधील (गोवा, महाराष्ट्र आणि कर्नाटक) सहकार्याची गरज असल्याचे देखील त्यांनी स्पष्ट केले. १४ दिवसांच्या आत ‘ओंकार’ हत्तीचं कर्नाटकमध्ये पुनर्वसन करण्यासाठी आवश्यक पावले उचलण्याची मागणी त्यांनी केलीय.

राज्यातील आणि सीमावर्ती भागातील नागरिकांमध्ये दहशत पसरवणाऱ्या हत्तीला नियंत्रणात आणण्यासाठी जोरदार प्रयत्न सुरू आहेत. ‘ओंकार’ हा हत्ती मूळ कळपापासून विभक्त होऊन गोवा-महाराष्ट्राच्या सीमेजवळील भागात वारंवार हेलपाटे मारत आहे.

शेतकरी आणि स्थानिक नागरिक या हत्तीच्या धुमाकुळामुळे चिंतेत आहेत. विशेषतः बागायती शेती आणि केळीच्या बागांना मोठा तडाखा बसला असून, अनेक शेतकऱ्यांचे उत्पादन पूर्णपणे नाश पावल्याचे अहवाल आहेत. स्थानिक लोकांनी प्रशासनाकडे त्वरित उपाय योजण्याची अपेक्षा व्यक्त केली आहे.

मंत्री राणे यांनी बैठकीत या प्रकरणावर तातडीने कारवाई करण्याची मागणी केली असून, त्रिपक्षीय सहकार्यातून हत्तीच्या नियंत्रणासाठी प्रभावी रणनीती राबवण्यावर भर दिला आहे. प्रशासनाकडूनही हत्तीच्या हालचालींवर सतत लक्ष ठेवून नागरिकांचे संरक्षण करण्याचे आश्वासन देण्यात आले आहे.