वास्को: मर्सिडीज गाडीचा समावेश असलेल्या अपघाताला नवीन वळण लागले आहे. पोलिसांच्या नोंदीनुसार, मोटारसायकलस्वार अशोक कुमार चौहान यांचा अपघातात जीव घेणाआधी आरोपी चालक विद्याधर प्रभू फातोर्डा पोलिस ठाण्यात एका वेगळ्या गुन्ह्याचा सामना करत होता.

भीषण अपघातानंतर वेर्णा पोलिसांनी प्रभूला अटक केली आणि त्याच्यावर भारतीय न्याय संहिता (बीएनएस)च्या कलम २८१, १०५, १२५(अ) आणि १२५(ब) तसेच मोटार वाहन कायद्याच्या कलम १३४अ, १३४ब आणि १८५ अंतर्गत गुन्हा दाखल केला. त्याला शनिवारी वास्कोतील प्रथम श्रेणी न्यायालयात हजर केले असता दोन दिवसांची पोलिस कोठडी सुनावली. चौहान यांच्या मृत्यूच्या परिस्थितीच्या तपासाचा भाग म्हणून पोलिस सदोष मनुष्यवधाच्या शक्यतेचीही तपासणी करत आहेत.

सूत्रांनुसार, प्रभूच्या आई-वडिलांनी २ सप्टेंबर रोजी फातोर्डा पोलिसांकडे तक्रार केली होती की, त्यांच्या मुलाने दारूच्या नशेत असताना त्यांच्यावर हल्ला केला आणि आक्रमकपणे वागला. पाठलाग करून

पुन्हा मारहाण

प्रभूचे वडील विनायक प्रभू यांनी त्यांच्या तक्रारीत म्हटले आहे की, १ सप्टेंबर रोजी रात्री सुमारे साडेदहा वाजता त्यांचा मुलगा नशेत घरी परतला आणि शिवीगाळ करू लागला. त्याने वडिलांना कानशिलात मारल्याचा आरोप आहे, तर त्याची आई शर्मिला प्रभू यांनाही मारहाण केली. त्यानंतर, भीतीमुळे आई-वडील आणि त्यांची सून सांकवाळे येथे गेले.

तक्रारीनुसार, दुसऱ्या दिवशी सकाळी प्रभू त्यांचा पाठलाग करत तिथे पोहोचला, जिथेही त्याने आई-वडिलांना शिवीगाळ व मारहाण केली व जीवे मारण्याची धमकी दिली.

नंतर जेव्हा पालक त्यांच्या कारमधून फातोर्डाच्या दिशेने जात होते, तेव्हा प्रभूने कथितरित्या त्यांच्या वाहनाचा पाठलाग केला, ते अडवले आणि त्यांना पुन्हा मारहाण केली. त्यानंतर त्यांनी फातोर्डा पोलिसांशी संपर्क साधला.