डिचोली: मये येथील प्रसिद्ध ''माल्या''च्या जत्रेच्या पार्श्वभूमीवर मुळगावच्या ''केळबाई''च्या पेठेचे (मंगळवारी) मये गावात आगमन झाले आहे. या पेठेसह मयेच्या देवीची पेठही पारंपारीक ठिकाणी स्थानापन्न झाली आहे.

मुळगावसह मयेतील देवीची पेठ पारंपरिक ठिकाणी नेताना यंदाही मागील दोन वर्षांप्रमाणे परंपरा खंडित झाली असली, तरी गेल्यावर्षीप्रमाणे यंदाही माल्याची जत्रा होणार असल्याचे स्पष्ट आहे. तशे संकेत मिळाले असून, भाविकभक्तांना तसा आशावादही आहे. मये येथील प्रसिद्ध ''माल्या''ची जत्रा येत्या गुरुवारी (ता. २६) साजरी करण्यात येणार आहे.

दरम्यान, यापूर्वीच्या वादाची पार्श्वभूमी लक्षात घेऊन पेठेच्या आगमनावेळी मये येथे मोठा पोलिस बंदोबस्त ठेवण्यात आला होता. प्रशासनासह पोलिस अधिकारी लक्ष ठेवून होते.

मुळगावची पेठेची जत्रा मये येथील ''माल्या''च्या जत्रेशी जोडली गेली आहे. त्यानुसार माल्याच्या जत्रेच्या आधी तीन दिवस परंपरेप्रमाणे मुळगावची पेठ मये गावात नेण्याची परंपरा आहे.

सोमवारी रात्री मुळगाव येथील केळबाई मंदिरात देवीची पेठ फुलांनी सजविण्यात आली. मध्यरात्री शेकडो भक्तगणांच्या साक्षीत वाजतगाजत आणि देवीच्या जयघोषात या पेठेचे मये गावात जाण्यासाठी प्रस्थान झाले. व्हाळशी, बोर्डे, पाजवाडामार्गे मार्गक्रमण करीत ही पेठ आज (मंगळवारी) पहाटे मये गावात दाखल झाली. वाटेत सर्वत्र भाविकांनी पेठेची सेवा करुन कौल घेतला.

यंदाही परंपरा खंडित

मुळगावची पेठ मये येथील श्री केळबाई मंदिरात पोचताच पारंपरिक विधी करून मुळगावसह आणि मये येथील देवीची पेठ सोबतच चव्हाट्यावर नेण्याची परंपरा आहे. मात्र गेल्या दोन वर्षांप्रमाणे यंदाही या परंपरेत खंड पडला.

पहाटे आगमन झाल्यानंतर मुळगावची पेठ केळबायवाडा येथील श्री केळबाई देवीच्या मंदिरात गेली खरी, मात्र ही पेठ आत न जाता मंदिराच्या दरवाजावरून परस्पर चव्हाटा याठिकाणी नेण्यात आली. मागाहून सायंकाळी येथील मयेच्या केळबाई देवीची पेठ सजविण्यात आली. पुजाअर्चा आदी पारंपरिक विधी पार पाडण्यात आल्यानंतर मयेची पेठ गावकरवाडा येथील चव्हाट्यावर नेण्यात आली. दोन्ही पेठांचे तीन दिवस मये येथील चव्हाट्यावर वास्तव्य असणार आहे.