मडगाव: घराबाहेर खेळत असताना विहिरीत पडलेल्या अभिषेक मलिक या तीन वर्षीय बालकाला अखेर मृत्‍यूने गाठलेच. उपचारासाठी त्याला गोमेकॉत दाखल करण्‍यात आले होते. तेथे त्याची प्राणज्‍योत मालवली.

सदर घटना मंगळवारी ४ नोव्‍हेंबर रोजी सदुबांद-मडगाव येथे घडली होती. त्‍या दिवशी दुपारी दोनच्‍या सुमारास अभिषेक हा खेळत असताना घराशेजारीच असलेल्‍या विहिरीत पडला होता. त्या विहिरीला कठडा नव्हता.

शेजारील लोकांच्‍या लक्षात ही घटना आल्‍यानंतर काहींनी विहिरीत उडी मारून अभिषेकला पाण्‍याबाहेर काढले आणि लागलीच दक्षिण गोवा जिल्हा इस्पितळात नेले. मात्र, प्रकृती चिंताजनक असल्याने नंतर त्याला गोमेकॉत हलविण्यात आले. तेथे डॉक्टरांनी त्याला वाचविण्याचे शर्थीने प्रयत्न केले. परंतु काल बुधवारी त्याचा मृत्यू झाला.

मलिक कुटुंबीय हे मूळ बिहार राज्यातील आहे. अभिषेकचे वडील कामगार असून, घटनेच्या दिवशी ते काही वस्तू खरेदी करण्यासाठी दुकानात गेले होते, अशी माहिती पोलिसांनी दिली. सर्व सोपस्‍कार करून मृतदेह कुटुंबीयांच्या ताब्यात देण्यात आला. अनैसर्गिक मृत्यू म्हणून मडगाव पोलिसांनी हे प्रकरण नोंदवून घेतले आहे. पोलिस निरीक्षक सूरज सामंत यांच्या मार्गदर्शनाखाली उपनिरीक्षक शुभम गावकर पुढील तपास करत आहेत.