सासष्टी: गत फेस्त फेरीतील गोळा केलेले सुमारे १७ लाख रुपये हडप केलेले मडगाव नगरपालिकेतील निलंबित कारकून योगेश शेटकर याला पोलिसांनी अटक केली आहे व चौकशी चालू आहे. त्यामुळे आपण यासंदर्भात जास्त काही बोलू शकत नाही. तरीही त्याच्याकडून पूर्ण रक्कम वसूल केली जाईल, असे मडगावचे नगराध्यक्ष दामोदर शिरोडकर यांनी मडगावात घेतलेल्या पत्रकार परिषदेत सांगितले.

सध्या त्याच्या प्रॉविडंट फंडात (Provident Fund) किती रक्कम आहे तसेच त्याची रजा किती बाकी आहे याबद्दल माहिती मिळविण्यात येत आहे. त्याच्याकडून ११ लाख रुपये वसूल करणे शक्य आहे. त्याच्याकडून यापूर्वीच तीन लाख रुपये वसूल करण्यात आले आहेत, अशी माहिती नगराध्यक्षांनी दिली.

गत फेस्त फेरी आपल्याला डावलून करण्यात आली होती. मात्र, यावेळी विद्यमान मुख्याधिकारी मेल्विन वाझ यांनी आपल्याला विश्र्वासात घेत फेस्त फेरीतून गोळा केलेली रक्कम व्यवस्थितपणे नगरपालिकेच्या खात्यात जमा करण्यात आली. यावेळी जवळ जवळ ३२ लाख पेक्षा जास्त महसूल नगरपालिकेला मिळाल्याची माहिती नगराध्यक्षांनी दिली. नगरपालिका इमारतीच्या नुतनीकरणासंदर्भातील प्रक्रिया लवकरच पूर्ण केली जाईल, पण सध्या ११ लाख रुपये खर्चून नगरपालिका इमारतीची रंगरंगोटी केली जात आहे, असे नगराध्यक्षानी सांगितले.