Margao fire brigade : मडगाव येथे दोन श्वानांना आणि पाच लहान पिल्लांना जीवदान देण्यात अग्नीशमन दलाच्या जवानांना यश आले आहे. ही घटना एसजीपीडीएच्या घाऊक मासळी मार्केट परिसरात घडली. जवानांनी पाण्यावर शिडीच्या सहाय्याने वाट काढत त्यांना बाहेर काढले. या कामाबद्दल अग्नीशमन दलाच्या जवानांचे मडगाववासीयांकडून कौतुक करण्यात येत आहे.

याबाबत अधिक माहिती अशी की, मडगाव येथील मासळी मार्केट परिसरात एका पडक्या घरात एका श्वानाने लहान पिल्लांना जन्म दिला होता. घराच्या दुसऱ्या बाजूला जवळच पुल बांधण्याचे काम चालू असल्याने खड्डा खणला आहे. सतत पडत असलेल्या पावसाने या जागेत पाणी भरल्याने श्वानांसह तिची पिल्ले तिथे अडकली होती.

याबाबतची माहिती मिळताच अग्नीशमन दलाच्या जवानांनी घटनास्थळी दाखल होत शिडी त्या पाण्यावर आडवी टाकून वाट तयार केली व श्वानांसह पिल्लांना एका टोपलीत घालून पाण्याच्या बाहेर काढले.