Margao Bus Stand Road Damaged: मडगावातील जुन्या बसस्थानकाजवळील खड्ड्यांमुळे चालकांना वाहतुकीस अडथळा निर्माण होत आहे. या पार्श्वभूमीवर चक्क रिक्षाचालकांनी रस्त्यावरील खड्डे दुरुस्तीचे काम केले.

अनेकदा याबाबत संबंधित अधिकाऱ्यांना सांगून देखील याबाबत कोणतेही ठोस पाऊल न उचलल्याने स्वत: रिक्षाचालकांनीच हे काम केल्याचे सांगितले.

माहितीनुसार, मडगाव स्थानकाजवळील पार्किंगसाठी निश्‍चित केलेली जागा खराब अवस्थेत आहे. याबाबत वारंवार तक्रार करूनही काहीच उपयोग झाला नाही.

मडगावातील, सबीना रेस्टॉरंटजवळील बसस्थानकाच्या प्रवेशद्वारावर मोठमोठे खड्डे पडल्याने रिक्षा व बसेसचे नुकसान झाल्याचे त्यांनी निदर्शनास आणून दिले. खड्ड्यांमुळे आमची वाहने खराब होत आहेत. शेवटी संतप्त चालकांनी आपण रस्त्याच्या दुरुस्तीसाठी पैसे देणार असल्याचेही सांगितले.

मडगाव जुने बसस्थानक गेल्या अनेक वर्षांपासून या दुरुस्तीच्या कामांमुळे चर्चेत आहे. त्यामुळे स्थानिक प्रशासनाने याकडे वेळीच लक्ष द्यावे, अशी मागणी होत आहे.