मराठीप्रेमी तथा प्रसिद्ध समाजसेवक कॅजिटन परेरा यांचे गुरुवारी (ता.6) सकाळी अल्पशा आजाराने आल्तीन, म्हापसा येथील निवासस्थानी निधन झाले. ते 80 वर्षांचे होते.

मराठी राजभाषा चळवळीतील क्रियाशील कार्यकर्ता तथा जाज्वल्य मराठीप्रेमी, अशी त्यांची ख्याती होती. परेरा यांच्या पार्थिवावर 10 एप्रिल रोजी सकाळी 10 वाजता म्हापसा मिलाग्रीस चर्चजवळील दफनभूमीत अंत्यसंस्कार केले जातील.

त्यांच्या पश्चात पत्नी, एक विवाहित पुत्र, विवाहित कन्या असा परिवार आहे. त्यांचे चिरंजीव विदेशात असल्याने रविवारपर्यंत ते गोव्यात पोचणार आहेत.

मोरजी येथील पीटर आल्वारिस हायस्कूलचे ते संस्थापक होते. मुख्याध्यापक म्हणून ते निवृत्त झाले. त्यांच्या निधनाची माहिती मिळताच माजी उपसभापती शंभू भाऊ बांदेकर, माजी केंद्रीय मंत्री अ‍ॅड. रमाकांत खलप, अ‍ॅड. प्रभाकर नारुलकर, अ‍ॅड. गोपाळ काणेकर, निवृत्त मुख्याध्यापक दयानंद मांद्रेकर यांनी अंत्यदर्शन घेतले. परेरा नेहमीच अन्यायाविरुद्ध लढायचे. मराठी वृत्तपत्रांतून ते अन्यायाविरुद्ध आवाज उठवित.-