मोरजी Morjim : या निवडणुकीत तरी पेडणे मतदारसंघातील भाजपची (BJP) उमेदवारी स्थानिक उमेदवाराला द्यावी, अशी मागणी पक्षाच्‍या ज्‍येष्‍ठ व मूळ कार्यकर्त्यांनी आज पेडणे शेतकरी सेवा सभागृहात घेतलेल्‍या पत्रकार परिषदेत केली. दरम्‍यान, या मागणीमुळे सध्‍याचे आमदार (MLA) तथा उपमुख्यमंत्री बाबू आजगावकर (Manohar Ajgaonkar) यांच्यावर हे कार्यकर्ते नाराज असल्‍याचे पुन्‍हा स्‍पष्‍ट झाले आहे.

या पत्रकार परिषदेला माजी जिल्हा पंचायत सदस्य रमेश सावळ, माजी भाजप मंडल अध्यक्ष कृशा गावडे, व्यंकटेश घोडगे, रोहिदास भाटलेकर, माजी सरपंच पंढरी आरोलकर, विश्वास नारोजी, जिल्हा पंचायत सदस्य रंगनाथ कलशावकर, सुरेश केरकर, तुषार गडेकर, कल्पेश परब, दिगंबर आस्तेकर, पंच सत्यभामा पेडणेकर, राकेश स्वार, राधिका गडेकर, शिवानी परब, साबाजी शेट्ये, महेश च्यारी, वासू हळर्णकर, अजित प्रभू, दशरथ गवंडी, राजन वीर, बाबनी गडेकर, श्रीधर देसाई, गिरीश कामत, गजानन देसाई, तुळशीदास कवठणकर, प्रीतम कळंगुटकर, प्रभाकर महाले, वसंत देसाई आदी कार्यकर्ते उपस्थित होते.

आम्‍ही भाजपचे निष्‍ठावंत कार्यकर्ते आहोत. त्‍यामुळे विधानसभा निवडणुकीत आम्हाला पक्षाने स्थानिक उमेदवार द्यावा. त्‍याच्‍या विजयासाठी आम्‍ही एकजुटीने कार्य करू. आमची मागणी पूर्ण होईल असा आम्‍हाला विश्वास आहे.

मागणीसाठी केले होते लाक्षणिक उपोषण

स्थानिक उमेदवार मिळावा यासाठी पेडणे भाजपचे माजी मंडल अध्यक्ष दाजी कासकर यांच्या नेतृत्वाखाली एक दिवसाचे लाक्षणिक उपोषण करण्‍यात आले होते. या उपोषणानंतर पक्ष दखल घेऊन उमेदवारी जाहीर करेल अशी अपेक्षा होती. मात्र तसे काही घडले नाही. त्‍यामुळे आम्‍ही पत्रकार परिषद घेऊन आता आमच्या मागणीकडे पक्षाचे लक्ष वेधून घेतले आहे. गेल्‍या पाच वर्षांपासून भाजप कार्यकर्त्यांना कुणी वालीच उरला नाही. भाजपच्या कार्यक्रमात व्यासपीठावर असूनही साधे नावसुद्धा घेतले जात नाही. ज्‍या कार्यकर्त्यांनी पक्ष वाढवला, त्यांनाच जर मान सन्मान मिळत नसेल तर काय उपयोग? म्‍हणूनच पक्षाने कार्यकर्त्यांचा मान राखून स्थानिक उमेदवार द्यावा अशी मागणी रमेश सावळ यांनी केली.

2012 च्या निवडणुकीनंतर पेडण्‍यात‍ स्‍थानिक उमेदवाराला तिकीट देणार असे आश्‍‍वासन माजी मुख्‍यमंत्री मनोहर पर्रीकर व पक्षाने आम्‍हाला दिले होते. पण 2017 च्या निवडणुकीतही आमच्‍या माथी ‘बाहेरचा’ उमेदवार लादला गेला. निदान आता तरी पक्षाने स्थानिक उमेदवार द्यावा. त्‍याला आमदार बनवण्याचे काम आमचे.