मोरजी: माजी सरपंच महेश कोनाडकर यांच्यावर जीवघेणा हल्ला झाल्यानंतर मांद्रेतील राजकारण चांगलेच तापलं आहे. मायकल लोबो, दयानंद सोपटे आणि जीत आरोलकर याप्रकरणामुळे आमने सामने आले आहेत. कोनाडकर हल्ल्यामागे आमदार आरोलकर यांचा हात असल्याचा आरोप सोपटे यांनी केला. आरोपानंतर आरोलकरांनी सोपटेंविरोधात अब्रुनुकसानीचा दावा ठोकण्याचा इशारा दिला आहे.

मांद्रेचे माजी आमदार दयानंद सोपटे यांनी कोनाडकर यांच्यावरील हल्ल्यामागे स्थानिक आमदाराचा हात असल्याचा खळबळजनक आरोप केलाय. आरोपानंतर आरोलकरांनी सोपटेंना कायदेशीर नोटीस बजावण्याचा इशारा दिला आहे. अब्रु नुकसानीचा दावा ठोकण्याचा इशारा आरोलकरांनी दिलाय. मायकल लोबोंनी काही दिवसांपूर्वी मांद्रेतून निवडणूक लढवण्याची इच्छा व्यक्त केली होती. त्यानंतर कोनाडकर यांच्यावर हल्ला झाल्याचे समोर आले आहे.

मांद्रेत पहिलाच कांड - जीत आरोलकर

'मारामारी, गन फायरिंग अशा घटना पहिल्यांदा कळंगुट सारख्या भागात होत होत्या. ते येथे आल्यानंतर मांद्रेत ही पहिलीच घटना आहे. मांद्रेतील हा पहिलाच कांड आहे. याबाबत लोकांनी विचार करायला हवा. पण, झालं ते चुकीचे झालं आणि याचा सोक्षमोक्ष लावला पाहिजे', असे आमदार जीर आरोलकर म्हणाले. आरोलकरांनी या वक्तव्यातून नाव न घेता लोबोंवर निशाणा साधला आहे.

दरम्यान, मांद्रेमध्ये गुन्हेगारी प्रवृत्ती बोकाळली आहे. खुलेआम धमकावण्याचे प्रकार होत आहेत. जी व्यक्ती चारवेळा पंच, दोनदा सरपंच होते, अशा कोनाडकरांवर भर दिवसा जीवघेणा हल्ला होतो, हे धक्कादायक आहे. या प्रकारामागे स्थानिक आमदाराचा हात आहे, असा आरोप दयानंद सोपटे यांनी केला आहे.

मांद्रेतून लढण्याबाबत सकारात्मक - मायकल लोबो

कोनाडकर हल्ला प्रकरणानंतर कळंगुटचे आमदार मायकल लोबोंनी मात्र मांद्रेतून लढण्याबाबत सकारात्मक असल्याचे म्हटले आहे. मांद्रेच नव्हे तर संपूर्ण गोव्याबाबत मी सकारात्मक असल्याचे त्यांनी म्हटले आहे.

कळंगुटमधील लोकांना मी नको असल्यास मांद्रेतून निवडणूक लढवणार, असे लोबो म्हणाले होते. त्यानंतर मांद्रेत राजकारण तापल्याचे पाहायला मिळत आहे.