मोरजी: सरकारी शाळा सुसज्ज बनवण्यासाठी सरकार दरबारी प्रयत्न सुरू आहेत. पालकांनी सरकारी शाळांमध्ये आपल्या पाल्यांना पाठवून त्या वाचवण्याचे प्रयत्न करावेत, असे आवाहन मांद्रे मतदारसंघाचे आमदार जीत आरोलकर यांनी आगरवाडा येथील सरकारी हायस्कूलच्या इमारतीच्या दुरुस्तीकामाचा शुभारंभ करताना केले.

यावेळी उपसरपंच शिल्पा नाईक, पंच दीपाली लिंगुटकर, पंच संगीता नाईक, पंच भगीरथ गावकर, देवस्थान समितीचे पदाधिकारी, माजी सरपंच तथा विद्यमान पंच सचिन राऊत, माजी सरपंच तथा पंच अँथनी फर्नांडिस, पालक-शिक्षक संघाचे अविनाश गावकर, मोरजकर, मुख्याध्यापक, शिक्षक, नागरिक आदी उपस्थित होते. स्वागत, सूत्रसंचालन आणि प्रास्ताविक शिक्षक प्रशांत मांद्रेरेकर यांनी केले.

आमदार जीत आरोलकर यांनी सांगितले की, मांद्रे मतदारसंघात एकमेव सरकारी हायस्कूल आहे आणि हे हायस्कूल साठ वर्षांपूर्वीचे होते. त्यामुळे या हायस्कूलच्या इमारतीच्या दुरुस्तीची गरज होती. त्यासाठी सरकार दरबारी प्रयत्न करून पालक-शिक्षक संघाने याचा पाठपुरावा करून या कामाचा आज शुभारंभ करण्यात आला आहे.

सरकारने १ कोटी २० लाख रुपये खर्च करून या इमारतीची दुरुस्ती करण्याचे काम हाती घेतले आहे. मुख्यमंत्री डॉ. प्रमोद सावंत यांच्या सहकार्यातून या इमारतीचे काम सुरू होत आहे. शाळा सुरू होण्यापूर्वी सर्व वर्ग चकाचक करून देणार, अशी ग्वाही यावेळी आमदार जीत आरोलकर यांनी दिली.