Agonda News :

आगोंद, श्रीस्थळ येथील श्री मल्लिकार्जुन देवस्थानचा प्रसिद्ध शिमगोत्सव आणि षष्ठीच्या जत्रेसाठी भाविकांचा महापूर लोटला होता. रविवारी मध्यरात्री या जत्रेची सांगता झाली. या उत्सवाला गोव्यासह कर्नाटक राज्यातील कारवार, जोयडा व अन्य तालुक्यांतील भाविक उपस्थित होते.

काणकोणचे उपजिल्हाधिकारी मधू नार्वेकर, अन्य शासकीय अधिकारी, विविध राजकीय पक्षांचे पदाधिकारी, तसेच आबालवृद्धांनी अवताराची थरारक दृश्‍ये पाहिली आणि कौल प्रसाद प्राप्त केला.

श्री मल्लिकार्जुन देवस्थानात पौष शुक्ल पौर्णिमा ते फाल्गुन कृष्ण षष्ठीपर्यंत सुमारे दोन महिने तरंगोत्सव, अवतार पुरुषाचा अवसर, कौलप्रसाद, शीर्षारान्नी, वीरमेळा, शिमग्याचे मेळ आणि षष्ठीची जत्रा असे विविध पारंपरिक उत्सव साजरे करण्यात आले.

पौष महिन्यात अवतार पुरुषाची तरंगे, देवाचे भगत, देवाचे गडे, ढोल-जगाट वादक, व इतर सेवेकरी उत्तर कर्नाटकात फिरून तेथील कुळावी लोकांना कौलप्रसाद देऊन एका महिन्याने माघारी आले. नंतर काणकोणात प्रमुख घरवय-मठाजवळ अवतार व कौलप्रसाद झाला. तरंगे व भगत यांनी प्रमुख कुटुंबांच्या घरी भेट दिल्या. यावेळी कुटुंबप्रमुख तरंगांची पूजा करून देवाला ‘तळया’ अर्पण करून आशीर्वाद घेतात. पारंपरिक वीरमेळा, तसेच शिमगोत्सवाची सांगता झाली.

महाजनांच्या किशोरवयीन मुलांनी ‘गुढी सेवा’ श्रीचरणी अर्पण केली. संध्याकाळी गुलालोत्सव झाला. रात्री पालखी व नंतर सुवारी वादनाचा कार्यक्रम झाला. खोलकर बंधूंनी सुवारी वादनाची सेवा अर्पण केली. उत्सव यशस्वी करण्यासाठी कार्यकारी समिती, किंदळेकर देसाई, नगर्सेकर देसाई कुटुंबीय, वांगडी व महाजन कार्यरत होते.

अभूतपूर्व ‘दिवजांचा उपवास’

शुक्रवारी दिवजांची सेवा अर्पण करणाऱ्या सुवासिनींचा अभूतपूर्व ‘दिवजांचा उपवास’ झाला. या दिवशी मल्लिकार्जुन देवाला अभिषेक केला. रात्री ८ वाजता श्रींची पालखीतून मिरवणूक काढली. शनिवारी दिवजांची मिरवणूक व भोंवरी झाल्या.

पहाटे सुवासिनींनी दिवज घरवय - मठाजवळ प्रज्वलीत केले. पुढे मंदिर परिसरात ‘दिवजांच्या भोंवरी’त त्या सामील झाल्या. नंतर मिरवणुकीने मंदिराला प्रदक्षिणा घातल्या. प्रार्थना करून दिवज ‘ओपले’ (मालवणे) झाले.