Vijai Sardesai: निवडणुका येतील आणि जातील, सरकारे येतील आणि जातील; पण धार्मिक सलोखा राखला पाहिजे. गोवावासी म्हणून आपले ते कर्तव्य आहे.

निवडणुकीत काय निकाल लागणार त्यापेक्षा ते अधिक महत्त्वाचे आहे, असे मत गोवा फॉरवर्डचे अध्यक्ष विजय सरदेसाई यांनी व्यक्त केले.

गोव्यात हिंदू मतांचे ध्रुवीकरण करण्यासाठी सध्या काही ठिकाणी हेतुपुरस्सर प्रयत्न होत आहेत त्या पार्श्वभूमीवर सरदेसाई यांनी हे वक्तव्य केले आहे.

मतदारांच्या एका गटाचे ध्रुवीकरण करण्याच्या उद्देशाने निवडणूक डोळ्यासमोर ठेवून धार्मिक सलोखा जाणूनबुजून बिघडवला जात आहे. हे पाहणे दुःखदायक आहे.

एक हिंदू या नात्याने गोयकारांनी हिंदू कसे असावे किंवा हिंदू धर्माचे पालन कसे करावे हे सांगण्यासाठी आम्हाला गोव्याच्या बाहेरील लोकांची गरज नाही, असे मला ठामपणे सांगायचे आहे.

शतकानुशतके आम्ही आमच्या धर्माचे आणि मंदिरांचे रक्षण केले आहे. आम्हाला काही शिकवण्यासाठी बाहेरच्या लोकांची गरज नाही, असे ते म्हणाले.

धार्मिक सहिष्णुता आणि शांततापूर्ण अस्तित्वाला मूर्त रूप देणारी भारताची कल्पना गोव्याने स्वीकारली आहे,

इतर भारतापेक्षा अधिक उत्कटतेने, प्रामाणिकपणे आणि सत्याने गोव्याने ही भूमिका निभावली आहे. आपण अनेकदा देशाच्या इतर भागांमध्ये दंगली पाहतो. गोव्यात अशाप्रकारचे जातीय तणाव आणि शत्रुत्व अस्तित्वात नाही, असेही सरदेसाई पुढे म्हणाले.

‘संस्कृती महत्त्वाचीच’

लईराई देवी असो किंवा मिलाग्रीस सायबिण असो, त्या आपल्या देवी आहेत आणि आपल्या समृद्ध संस्कृतीचा अविभाज्य भाग आहेत.

माझ्यासाठी, आपल्या संस्कृतीबद्दल जागरूकता वाढवणे आणि धार्मिक सौहार्दाला प्रोत्साहन देणे हे कोणत्याही निवडणुकीपेक्षा महत्त्वाचे आहे आणि त्यासाठी मी मनापासून योगदान देईन, असे सरदेसाई यांनी म्हटले आहे.