सासष्टी: मायणा-कुडतरी येथील प्रस्तावित मेगा गृह प्रकल्पाविरोधात स्थानिकांचा विरोध दिवसेंदिवस तीव्र होत असून, याप्रकरणी पंचायत खात्याच्या अतिरिक्त संचालकांकडे सुरू असलेल्या सुनावणीदरम्यान गुरुवारी संबंधित अधिकारी गैरहजर राहिल्याने सुनावणी पुन्हा तहकूब करण्यात आली. या प्रकरणात आतापर्यंत पाच सुनावण्या झाल्या असून, संबंधित अधिकारी वारंवार अनुपस्थित राहत असल्याने ग्रामस्थांनी नाराजी व्यक्त केली आहे.

या प्रकरणात गट विकास अधिकाऱ्यांनी कुडतरी ग्रामपंचायतीवर कर्तव्यात हलगर्जीपणाचा शेरा मारला आहे. त्यानंतर स्थानिकांनी मावळते सरपंच व ग्रामसचिव यांच्या विरोधात तक्रार दाखल करून त्यांच्यावर खात्याअंतर्गत तसेच प्रशासकीय चौकशी करून योग्य कारवाईची मागणी केली.

सुनावणीनंतर पत्रकारांशी बोलताना काँग्रेस (Congress) नेते मोरेन रेबेलो आणि मिशेल रेबेलो यांनी सांगितले की, संबंधित अधिकारी यापूर्वीही तीनवेळा सुनावणीस गैरहजर राहिल्याने या संपूर्ण प्रकरणात काहीतरी संशयास्पद असल्याची शक्यता वाटते. अधिकारी अनुपस्थित असल्यामुळे नियोजित अंतरिम अर्जही दाखल करता आला नाही.