मडकई: बागवाडा - सीमेपाईण म्हार्दोळ भागात पंधरवड्याभरापूर्वी बिबट्या सापडल्याने या परिसरात घबराट पसरली होती. जखमी अवस्थेतील तो बिबट्या मरण पावला असला तरी आता अन्य बिबट्यांच्या डरकाळ्या झरीवाडा-प्रियोळ परिसरात ऐकू येण्याबरोबरच येथील घरांच्या जवळ तसेच रस्त्यावर दर्शनही काही ग्रामस्थांना झाल्याने हा परिसर आता भीतीच्या छायेत आहे.

याप्रकरणी वन खात्याला माहिती देण्यात आली असून खात्याच्या अधिकाऱ्यांना या भागात येऊन पाहणीही केली आहे. या बिबट्यांना जेरबंद करण्यासाठी वन खात्याने या परिसरात पिंजरा लावावा, अशी मागणी येथील ग्रामस्थांनी केली आहे. (Leopard terror in Mardol area)

बागवाडा - सीमेपाईण म्हार्दोळ येथे बिबट्याचे प्रकरण झाल्यानंतर येथील लोकांनी सुटकेचा सुस्कारा सोडला होता, पण गेल्या आठवड्याभरात म्हार्दोळ - सीमेपाईण मंगेशीच्या डोंगर भागात डरकाळ्या ऐकू येऊ लागल्याने बिबट्यांचा वावर परिसरात असल्याचे पुन्हा स्पष्ट झाले आहे. शिवाय परिसरातील कुत्रे नाहिशी झाल्याचे येथील ग्रामस्थ रमेश गावडे यांनी सांगितले. त्यातच बुधवारी रात्री साडेनऊच्या सुमारास झरीवाडा - प्रियोळ येथील एक ग्रामस्थ सुनील गावडे यांच्या घराच्या मागे प्रत्यक्ष बिबट्या दिसल्याने या कुटुंबाची घाबरगुंडी उडाली.

पथदीप नसल्याने अधिकच धोका

या परिसरात पथदीप नसल्याने परिसरातील लोकांना बिबट्यांपासून अधिकच धोका निर्माण झाला आहे. रात्रीच्यावेळी हा परिसर अंधारात असतो. पथदीप लावण्यासाठी सातत्याने मागणी करावी लागते, अशी तक्रार खुद्द पंचायत सदस्यांकडून करण्यात येते. वीज खात्याने याप्रकरणी त्वरित लक्ष देऊन या परिसरातील अंधार दूर करावा, अशीही मागणी होत आहे.

बिबट्यांपासून या परिसरात अतिशय धोका निर्माण झाला आहे. बागवाडा येथे बिबट्या सापडल्यानंतर लोक भयमुक्त झाले होते, पण अजूनही बिबट्यांचे दर्शन होत असल्याने येथील लोक घाबरले आहेत.

- हरिश्‍चंद्र जल्मी (पंचसदस्य, वेलिंग प्रियोळ कुंकळ्ये पंचायत)

झरीवाडा - प्रियोळ येथे खुद्द आमच्या घराच्या मागे बिबटा दिसल्याने परिसरात भीती पसरली आहे. रात्रीच्यावेळी हा बिबटा दिसल्याने आता बाहेर पडणेही धोक्याचे वाटत आहे. वन खात्याला याप्रकरणी कळवल्यानंतर त्यांनी या भागात येऊन पाहणी केली, पण बिबट्या सापडू शकलेला नाही. किमान तीन बिबटे या परिसरात फिरत असावेत, असा कयास आहे. त्यामुळे वन खात्याने या बिबट्यांना पकडण्यासाठी पिंजरा लावावा आणि लोकांना भयमुक्त करावे.

- सुनील गावडे (स्थानिक ग्रामस्थ, झरीवाडा - प्रियोळ)