फोंडा : दयानंदनगर-धारबांदोडा येथील संजीवनी साखर कारखान्याच्या मागील भागात रानटी प्राण्यांना पकडण्यासाठी लावण्यात आलेल्या फासात अडकलेल्या बिबट्याची वन खात्याच्या पथकाने यशस्वी सुटका केली. सुटकेनंतर त्याला वैद्यकीय तपासणीसाठी व पुढील देखरेखीकरिता बोंडला वन्यजीव अभयारण्य येथे हलविण्यात आले.

माहितीनुसार, परिसरातील काजू बागायती भागात अज्ञात व्यक्तींनी रानटी प्राण्यांची शिकार करण्याच्या उद्देशाने फासे लावले होते. शनिवारी सकाळी सुमारे साडेअकराच्या सुमारास स्थानिकांना एका फासात बिबट्या अडकल्याचे निदर्शनास आले. त्यांनी तत्काळ फोंडा वनविभागाशी संपर्क साधून घटनेची माहिती दिली.

वन अधिकाऱ्यांचे पथक त्वरित घटनास्थळी दाखल झाले. परिस्थितीचा आढावा घेत आवश्यक ती खबरदारी बाळगून बिबट्याला सुरक्षितरीत्या बेशुद्ध करण्यात आले आणि फासातून मुक्त करण्यात आले. प्राथमिक तपासणीत त्याच्या मान व पुढील पायाला किरकोळ जखमा आढळून आल्या. उपचारासाठी व निरीक्षणाखाली ठेवण्यासाठी त्याची रवानगी बोंडला येथे करण्यात आली.

दरम्यान, संबंधित भागात बेकायदेशीररीत्या फासे लावणाऱ्यांचा शोध सुरू असून अशा प्रकारांविरोधात कठोर कारवाई केली जाणार असल्याचे वन विभागाने स्पष्ट केले आहे. जंगल परिसरात सापळे लावणे हा कायद्याने दंडनीय गुन्हा असल्याने नागरिकांनी सतर्क राहून तात्काळ माहिती द्यावी, असे आवाहन करण्यात आले आहे.