Lairai Devi Jatra 2024 :

डिचोली, श्री लईराई देवीच्या जत्रेत यंदाही गोबी मंच्युरियनचे स्टॉल्‍स दिसून आले नाहीत. तर, दुसऱ्या बाजूने अस्नोडा पंचायत क्षेत्रात मात्र शिरगावच्या दिशेने जाणाऱ्या रस्त्यावर ‘गोबी’चे स्टॉल्‍स दिसून येत होते.

ते अस्नोडा पंचायत क्षेत्रात येत असल्याने कोणी कारवाई करण्यासही पुढे आले नाही.

शिरगावात जत्रेच्या फेरीत ‘गोबी’चे स्टॉल्‍स नसले तरी ‘गोबी’खवय्यांच्या जिभेचे चोचले पूर्ण झाले. शिरगावात जत्रेसाठी आलेल्या अनेकांनी शिरगावच्या हद्दीबाहेर अस्नोड्यात ‘गोबी’चा मनसोक्त आस्वाद घेतला. रात्री उशिरापर्यंत हे स्टॉल्‍स सुरू होते.

गेल्या वर्षी जत्रोत्सवाच्या काळात तर ‘गोबी मंच्युरियन’वाले शिरगावात फिरकले नाहीत. यंदाही जत्रेत ‘गोबी’चे स्टॉल्‍स थाटण्यास बंदी घालण्याच्या निर्णयाची कडकपणे अंमलबजावणी करण्याचे देवस्थान समितीने ठरविले होते. त्यामुळे यंदाही श्री लईराई देवीच्या जत्रेत शिरगावात असे स्टॉल्‍स थाटण्याचे धाडस ‘गोबी’वाल्यांनी केले नाही. त्यामुळे सलग तिसऱ्या वर्षी शिरगावात ‘गोबी’चे स्‍टॉल्‍स दिसून आले नाहीत.

शिरगाव झाले ‘गोबीमुक्त’

गेल्या काही वर्षांपासून ‘गोबी मंच्युरियन’चे प्रस्थ वाढले आहे. गावोगावी साजऱ्या होणाऱ्या जत्रा आणि अन्य उत्सवावेळी ‘गोबी’चे स्टॉल्‍स दिसून येत आहेत. तीन वर्षांपूर्वी शिरगाव जत्रोत्सवात हेच चित्र दिसून येत होते. ‘गोबी’वाल्यांचा उद्रेक वाढला होता.

मात्र २०२२ साली शिरगाव जत्रेत ‘गोबी’च्या स्टॉल्‍सवर बंदी घालण्याचा निर्णय देवस्थान समितीने घेऊन त्याची कडकपणे अंमलबजावणी केली. तेव्‍हापासून या जत्रोत्‍सवात ‘गोबी’चे स्‍टॉल्‍स लावण्‍याचा केलेला प्रयत्न यशस्वी झाला नाही.