मडगाव: लाच घेतल्याच्या आरोपाखाली लाच लुचपत प्रतिबंधक विभागाने अटक केलेला कोकण रेल्वे पोलिस स्थानकाचा तत्कालीन निरीक्षक सुनील गुडलर याने छापा टाकलेल्या दिवसाचे सीसीटीव्ही फुटेज आपल्याला द्यावे अशी न्यायालयाकडे केलेली मागणी दक्षिण गोव्याच्या अतिरिक्त सत्र न्यायाधीश पूजा कवळेकर यांनी फेटाळून लावली.

मात्र, तपास यंत्रणेने हे फुटेज सांभाळून ठेवावे आणि या प्रकरणात आरोपपत्र दाखल झाल्यावर संशयिताला वाटल्यास त्याने हे फुटेज मिळवण्यासाठी पुन्हा अर्ज करावा, असे न्यायालयाने स्पष्ट केले.

लाच लुचपत प्रतिबंधक विभागाने २१ एप्रिल रोजी हा छापा टाकला होता. त्यात निरीक्षक गुडलर आणि एका हवालदाराला अटक केली होती. २१ एप्रिल रोजी सायंकाळी ६ वाजता सुरू केलेली ही कारवाई २२ एप्रिलच्या पहाटे २ वाजेपर्यंत चालू होती.

या कलाधीतील कोकण रेल्वे स्थानक परिसर आणि कोकण रेल्वे पोलिस स्थानकाच्या तळ मजल्यावर असलेल्या सर्व सीसीटीव्ही कॅमेऱ्याचे फुटेज आपल्याला उपलब्ध करून दिले जावे असा अर्ज गुडलर याने केला होता.

गुडलर याच्या वतीने युक्तिवाद करताना सर्वोच्च न्यायालयाच्या आदेशाचा हवाला देत सीसीटीव्ही फुटेज मिळणे हा संशयिताचा अधिकार असल्याचा दावा ॲड. ए. सैल यांनी केला, तर हे फुटेज तपासाचा मुख्य आधार असल्याने आणि हा तपास अजून प्राथमिक अवस्थेत असल्याने या टप्प्यात ते संशयिताला देणे योग्य नव्हे असा आक्षेप सरकारी वकील देवानंद कोरगावकर यांनी घेतला होता. न्यायालयाने दोन्ही पक्षांच्या बाजू ऐकून घेतल्यानंतर वरील आदेश दिला.