मडगाव: कोकण रेल्वे मार्गावरील प्रवाशांचे आरोग्य आणि सुरक्षितता जपण्यासाठी रेल्वे प्रशासनाने कडक पावले उचलण्यास सुरुवात केली आहे. ३१ मेपासून कोकण रेल्वेच्या वाणिज्य विभागाने आणि रेल्वे सुरक्षा दलाने संयुक्तपणे १५ दिवसांची विशेष मोहीम हाती घेतली आहे. मोहिमेच्या प्रारंभीच जनशताब्दी एक्स्प्रेसमध्ये एका अनधिकृत विक्रेत्यावर कारवाई करण्यात आली.

कोकण रेल्वेचे जनसंपर्क अधिकारी बबन घाटगे यांनी दिलेल्या माहितीनुसार, ३१ मे रोजी मडगाव ते मुंबई सीएसएमटी यादरम्यान धावणाऱ्या गाडी क्रमांक १२०५२ जनशताब्दी एक्स्प्रेसमध्ये एक विक्रेता कुजलेली फळे विकताना आढळून आला. विशेष म्‍हणजे त्‍याच्‍याकडे वैध ओळखपत्र, विक्री परवाना नव्‍हता.

विशेष मोहीम

कोकण रेल्वेने सुरू केलेली ही विशेष मोहीम संपूर्ण रेल्वे नेटवर्कवर राबवली जात आहे. अनधिकृत विक्री रोखणे, प्रवाशांची आर्थिक फसवणूक थांबवणे तसेच खाद्यपदार्थांचा दर्जा आणि स्वच्छता सुनिश्चित करणे, यावर या मोहिमेत विशेष भर दिला जात आहे.

प्रवाशांचा प्रवास अधिक सुरक्षित आणि सुखकर व्हावा, हा या मोहिमेचा मुख्य उद्देश आहे.प्रवासादरम्यान अशा प्रकारचे अनधिकृत विक्रेते किंवा संशयास्पद प्रकार आढळल्यास त्यांनी तत्काळ रेल्वे प्रशासन अथवा रेल्वे सुरक्षा दलाकडे तक्रार नोंदवावी.