कोल्हापूर/पणजी : कोल्हापूर येथील शिवाजी विद्यापीठातील मुलींच्या वसतिगृहात इशिता मधूसुदन सावंत (वय २३, रा. रामभुवनवाडा, रायबंदर) हिने गळफास घेऊन आत्महत्या केली.

शुक्रवारी रात्री अकराच्या सुमारास हा प्रकार उघडकीस आला. मृत्यूपूर्वी तिने लिहिलेली चिठ्ठी पोलिसांच्या हाती लागली असून ‘मिस यू डॅडी...’ असे तिचे शेवटचे शब्द आहेत. वसतिगृहातील ३० क्रमांकाच्या खोलीत इशिता चार सहकारी मुलींसोबत राहात होती.

गुढीपाडव्याच्या सुटीनिमित्त इतर तिघी मुली गावी गेल्याने इशिता एकटीच खोलीत होती. रात्री उशिरापर्यंत ती खोलीबाहेर आली नसल्याने शेजारील खोलीतील मुलींनी आत डोकावून पाहिले असता तिने गळफास घेतल्याचे दिसून आले.

वसतिगृह वॉर्डन शीला सोनवणे यांनी कर्मचाऱ्यांच्या मदतीने तिला तातडीने ‘सीपीआर’मध्ये दाखल केले. मात्र, उपचारापूर्वीच तिचा मृत्यू झाल्याचे डॉक्टरांनी सांगितले.