Xeldem Sarpanch : शेल्डे पंचायतीच्या सरपंचपदी कविता गावस देसाई यांची बिनविरोध निवड झाली असून दीप्ती नाईक यांच्यावर अविश्वास ठराव संमत झाल्याने हे पद रिक्त झाले होते.

शेल्डे पंचायतीच्या सरपंचपदी दीप्ती नाईक यांनी फक्त आठ महिन्यांचा कालावधी पूर्ण केला होता. पण अचानक आठ पंच सदस्यांनी त्यांच्यावर अविश्वास ठराव दाखल करून त्यांना पदावरून खाली खेचले होते.

दीप्ती नाईक यांना सार्वजनिक बांधकाम मंत्री निलेश काब्राल यांनीच प्रथम पसंती देऊन सरपंचपदी विराजमान केले होते. तिळामळ नवीमड्डी येथील रहिवासी प्रकल्पावरून उठलेल्या वादळात दीप्ती नाईक यांना आपले हे पद गमवावे लागले होते.

सदर प्रकल्प जॉनन फेर्नांडिस यांचा असून नाईक यांनी सदर प्रकल्पाचे काम बंद करण्याचे आदेश दिल्याने काही पंच सदस्य नाईक यांच्यावर नाराज झाले होते.

शेल्डे पंचायतीच्या सरपंचपदी कविता गावस देसाई यांची बिनविरोध निवड झाली. सार्वजनिक बांधकाम मंत्री काब्राल यांनी कविता गावस देसाई यांचे अभिनंदन करून पंचायत क्षेत्रातील कामे लवकरात लवकर मार्गी लावण्यासाठी प्रयत्न करावे असे सांगितले तसेच सदर पंचायत घर अपुरे पडत असल्याने नवीन पंचायत घर बांधण्यासाठी आपला प्रयत्न असून सर्व पंच सदस्यांचे सहकार्य या कामाला मिळाले पाहिजे असे त्यांनी सांगितले.

यावेळी कविता गावस देसाई यांनी पंचायतीच्या विकास कामांसाठी आमदारांचे सहकार्य आम्हाला मिळेल व त्यांच्याच मार्गदर्शनाखाली सर्व पंच सदस्यांना विश्वासात घेऊन काम करणार असल्याचे सांगितले.