बार्देश: कर्नाटकातील चोरीच्या सोन्याच्या दागिन्यांच्या प्रकरणाचे धागेदोरे आता गोव्यातील म्हापशापर्यंत पोहोचले आहेत. या प्रकरणाचा तपास करणाऱ्या कर्नाटक पोलिसांच्या विशेष पथकाने बुधवारी संशयिताला सोबत घेऊन म्हापशातील एका सराफा दुकानात भेट देत चौकशी केली. संशयिताने चोरीचे सोन्याचे दागिने याच दुकानात विकल्याची माहिती तपासात समोर आली आहे.

पोलिस पथक संबंधित दुकानात पोहोचले असता दुकानमालक उपस्थित नसल्याने सविस्तर चौकशी होऊ शकली नाही. त्यानंतर पोलिसांनी दुकानातील कर्मचाऱ्यांकडून प्राथमिक माहिती घेतली. तसेच व्यवहाराशी संबंधित नोंदी, खरेदी-विक्रीची कागदपत्रे, सीसीटीव्ही फुटेज आणि इतर पुराव्यांची माहितीही मागविण्यात आली.

सूत्रांच्या माहितीनुसार, या प्रकरणाच्या पुढील तपासासाठी कर्नाटक पोलिसांनी संबंधित सराफा दुकानाच्या मालकाला चौकशीसाठी हजर राहण्याचे समन्स बजावले आहेत. संशयिताने विकलेले दागिने चोरीचे असल्याची माहिती सराफाला होती का? व्यवहार कायदेशीर पद्धतीने झाला होता का? आणि सोन्याची खरेदी करताना आवश्यक ओळखपत्र व नोंदी घेण्यात आल्या होत्या का? याची कसून चौकशी केली जाणार आहे.

चोरीच्या मालाचा माग काढण्यासाठी कर्नाटक पोलिस विविध राज्यांमध्ये तपास करत असून गोव्यातील हा व्यवहार तपासातील महत्त्वाचा दुवा मानला जात आहे. तपास पूर्ण झाल्यानंतरच या प्रकरणात आणखी कोणाची भूमिका आहे का? हे स्पष्ट होणार आहे. दरम्यान, या प्रकरणी अद्याप कोणत्याही सराफाविरुद्ध गुन्हा दाखल करण्यात आलेला नसून चौकशी आणि पुराव्यांच्या आधारे पुढील कायदेशीर कारवाई केली जाणार असल्याची माहिती सूत्रांनी दिली.

आमच्याकडे तक्रार नाही ः म्हापसा पोलिस

यासंदर्भात म्हापसा पोलिस अधिकाऱ्यांकडे चौकशी केली असता त्यांनी सांगितले की, चोरीचे दागिने कर्नाटकातील एका चोरट्याने म्हापशातील एका सोनाराला विकल्या प्रकरणी कर्नाटकातील पोलिस म्हापशातील एका सराफाच्या दुकानात तपासणी करून गेले, पण त्याबाबत आमच्याकडे त्यांची तक्रार नसल्याचे सांगण्यात आले.